Ансамбль «Кычера» запрашат

Лемківскій Ансамбль Пісні і Танця «Кычера», котрий фунґує на чужыні в Ліґници, оголашат осінній набір на членів колективу. Записати ся мож до танцувальной ґрупы, капелі, або хору. Набір є направлений на вшыткых, котрым близка єст лемківска культура, а котры неконечні мусят мати досвідчыня, звязане з народным танцьом, або співом. Рекрутацийны стрічы будут проходити в кажду пятницю в Ліґницкым Центрі Культуры.

Очывидно – радо виджены сут люде молоды, котры на долший час задумают звязаты своє жытя з ансамбльом. Є то тіж подиктуване охотом збудуваня новой ґрупы, котра зачала бы роботу над новым проґрамом. Влони, в рамках веденой рекрутациі ансамбль зложыл в девятдесятьох процентах нову ґрупу, котра скоро заступила старшых камаратів, котры з рациі студий ци роботы мали меньшу змогу брати активну участ в пробах ансамблю. Єдным з першых успіхів новых Кычеряків было зрыхтуваня видовиска Лемківскы собіткы, котре в пленері мож было обзерати на минулій ХХХVI Лемківскій Ватрі на Чужыні в Михалові. То єден з ліпшых успіхів ансамблю за послідні рокы діяльности.

«Кычера» то гейбы дітина Репрезентацийного Ансамблю «Лемковина» з Білянкы. Колектив был оснований в 1991 році стараньом Юрия Стариньского, котрий скликал ґу собі дотеперішніх членів тзв. західньой ґрупы «Лемковины», котра уж деякій час вела пробы на заході, але в рамках діяльности білянчаньского ансамблю, веденого Маестром Ярославом Трохановскым. О кілько «Лемковина» свою головну артистичну діяльніст зосередила на перфекцийным хоровым співі і капели, «Кычера» радше пішла в напрям народных танців. Доднес ансамбль презентує автентичний, як і стилізуваний фольклор з обшыри Карпатской Руси, але предовшыткым Лемковины. В його репертурарі находят ся обряды: Лемківкє весіля, видовиско Федоры, та однедавна Лемківскы собіткы. «Кычера» за 25 років діяльности выпустила три платні з лемківском музыком. Гейбы найціннійша і міцно автентична являт ся перша платня пн. Цне мі ся за Тобом, понеже то на ній мож чути прекрасну капелю, творену товды гудаками, котры зачынали музыкуваня іщы в рідных горах.

https://www.youtube.com/watch?v=GJqxnGhUa_s

фот. горі: лоґо «Кычеры»