Ансамбель Рутенія став лавреатом конкурзу Языком танця

В днях 4-го аж 6-го новембра 2022-го року в просторах Театру Йозефа Ґреґора Тайовского у Зволені проходив 27-ый річник цілодержавного поступового конкурзу і переглядкы хореоґрафій фолклорных ансамблів і танечных ґруп з назвов Языком танця 2022.

На цілодержавнім конкурзі, котрого головныма орґанізаторами были Народный освітній центер і Підполяньскый освітній центер, представило ся довєдна 14 ансамблів або ґруп. Змагали ся в двох катеґоріях. В актеґорії А были хореоґрафії, котры презентують традічну форму фолклорного матеріалу, катеґорія Б належала танечно-театралным выступліням, котры выходять або суть іншпірованы традічным матеріалом.

На цілословацькый конкурз до Зволена поступив і Фолклорный ансамбель Рутенія з Братіславы, котрый занимать ся выключно русиньскым фолклором. До Зволена Рутенія пришла з танцями з Підкарпатя в рамках проґраму під назвов Ярь на Підкарпатьскій Руси.

Рутенія змагала ся в катеґорії А, значіть в рамках традічной формы фолклорного матеріалу. Їх презентація была успішна. Фахова журі вырішыла, же у своїй катеґорії, де было довєдна девять змагаючіх ся, став Фолклорный ансамбель Рутенія лавреатом.

Языком танця (передтым Танцюй, танцюй) є найвызначнішов подійов свого тіпу на Словакії. Проходить кажды три рокы. Конкурз є про непрофесіоналны фолклорны колектівы, котры презентують традічны музичны, танечны, робочі, обрядовы і звыкословны проявы.

Посланьом конкурзу є творити простор про презентацію творчости непрофесіоналных фолклорных колектівів, підтримовати їх розвиток і піднимати художню уровень, популарізовати выхову народным уменьом, а передовшыткым вказовати на значіня народной културы в културнім діяню і вести людей ку спознаваню той културы.

Ансамбель Рутенія є на сцені вже 12 років. Своїх десять років од основаня ансамбель одсвятковав з причіны пандемії аж тот рік в юні, коли одбыла ся премєра їх новой танечно-драматічной інсценації з назвов Хырветом ку горам.

Покровительство над 10-ов річніцьов Рутенії втогды перевязла презідентка Словацькой републікы Зузана Чапутова.

Уповномоченый влады Словацькой републікы про народностны меншыны Ласло Буковскый при нагоді 10-ой річніці уділив ансамблю Золоту медайлу Словацькой републікы, котра є „узаньом і подякованьом за роботу, котру ведучі і членове колектіву зробили про розвиток културы і фолклору Русинів на Словакії“. Золота медайла Словацькой републікы є нагородов Уряду влады Словацькой републікы.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА