Ангелы співают в Рускій Бурсі

(фото горі: Петро Медвідь)

Дня 25. січня 2015 р. о 14.00 год. в Рускій Бурсі одбыла ся циклічна уж імпреза під наголовком “Перегляд колядничых ґруп”. Бурса выполнила ся ангелами, чортами, Жыдами, царями, пастушками і, очывидні, не бракнуло Мариі, Йосифа і Божого Дітятка. Праві 90-еро діти і молодежы выступило на бурсяній невеликій сцені. Малы акторы зъіхали ся до нас з Ґладышова, Высовы, Ганчовы, Баниці, Бодаків, Устя Руского і Бортного.

Што рока Бурса запрашат учытелів лемківского языка до участи в тій подіі, але в тым просторі неє ограничынь, бо каждий може привчыти діти і прити зо своіма колядниками. Є то уж не лем бурсяна, але і шкільна традиция. Нихто уж не уявлят собі не заколядувати в Бурсі в святочным періоді. Выступы поперджают все долгы і інтенсивны пробы. Ученикы зачынают ся вчыти уж пару місяців скорше. Рыхтуют облечыня, вчат ся текстів, вінчувань, коляд. Діти все сут барз добрі прирыхтуваны. Кус смішат і бавлят, кус піддают під задуму, кус зворушают. Все є вельо емоций, так на сцені, як і посеред публикы, котра все жыво реаґує, бо як не быти гордым, коли на сцені выступуют діти, внукы…

Вшыткых ґруп запрезентувало ся 6, як тіж ансамбль “Терочка” ведений Андрийом Трохановскым. В тым році запрошыня приняли штырі учытелькы лемківского языка Пані Варвара Дуць, Пані Анна Рыдзанич, Пані Анна Дубец-Дыльонґ і Пані Орина Гутыряк. Додатково выступили тіж ґрупы зрыхтуваны през Пана Петра Вірхняньского як тіж ґрупа ведена през отця Аркадия Бараньчука і Пана Мірка Пелехача. Дві остані зо своіма вертепами колядували по селах Лемковины. Віковы катеґориі были ріжны. Од “зерівкы” (5-літні діточкы), през основну школу клясы 1-3, 4-6 як тіж ґімназия і середня школа.

По выступах на діти ждал заслужений почастунок, по котрым, коли набрали уж сил, долго іщы спільні разом колядували. Никому не спішыло ся дохыж. Бурсяна, святочна іщы, атмосфера давала вшыткым тепло і радіст зо спільного перебываня.

Ґалерия знимок з той подіі, котрой автором єст Ярослав Мазур, знаний не лем з гудакуваня в Гудаках, але і з доброго “фотоґрафічного ока”, находит ся за тым мотузком.