Андрій Смолак выставлює в Москві

11-го авґуста 2016-го року была в Словацькім інштітуті в Москві торжественно одкрыта персонална выставка академіка Міджінародной академії културы і уменя (Международная академия культуры и искусства), русиньского маляря зо Словакії Андрія Смолака. Інформовав о тім сайт академії.

На вернісажі быв участный і надзвычайный і повномочный амбасадор Словацькой републікы в Російскій федерації Петер Пріпутен, котрый у своїм приговорі повів, же з Андрійом Смолаком го звязує довгорічне приятельство, і выразив радость, же хоць є Смолак в Росії добрі знамым умелцьом, довгы рокы актівно співпрацує з російскыма умелцями і в Росії уж выставльовав дакілько раз, в Москві ся його творы вказують по першый раз.

Директор Словацького інштітуту Ян Шмігула подяковав многочісленным гостям і приятелям маляря за то, же хоць суть літні вакації, нашли собі час на то, жебы прийти до Словавцького інштітуту на Смолакову выставку.

Куратор выставкы, сын умелця Андрій Смолак молодшый, підкреслив, же харектерістічным про творчость його вітця є скушеность – умелець не зображать обнажены жены – моделы, а зображать їх душы, їх внутрішній світ. Автор выставльованых творів Андрій Смолак участным повів, співпраца з російскыма умелцями є про нього взаємно обогачуюча, має з нима тісны контакты і подяковав за можливость вказати свої творы в Словацькім інштітуті. Выставку буде мож в Москві видіти до 19-го септембра т. р.

Андрій Смолак

Андрій Смолак (1953) походить із села Старина (днесь неіснуюче село) в сниньскій долині. Абсолвовав Філозофічну факулту Універзіты Павла Йозефа Шафарика в Пряшові (вытварна выхова і російскый язык) і выняткове штудіюм на Академії вытварных умень в Празі. Є автором веце як 6000 образів, мав веце як 60 выставок дома і за граніцями. Зачатком 1990-ых років зо своїм братом Міром Смолаком отворив в Снині філіалку братовой ґалерії з назвов Galerie MIRO, котра є доднесь в Празі. Од року 2004 в Снині веде ґалерію під своїм меном – Galéria Andrej Smolák. Єднако так філіалку той ґалерії веде і в Братіславі. Ініціовав окрім іншого Міджінародный вытварный фестівал в Снині, котрый ся од 1994 року одбывать шторік. Засновав вецеро фундацій. В 2004-ім році засновав і пріватну основну умелецьку школу. Є автором многых проєктів, котры підпорують русиньску културу, вытварне уменя і обчаньску сполочность.

На фотоґрафії горі: Амбасадор Чеськой републікы в Російскій федерації Владимір Ремек зо женов, амбасадор Словацькой републікы Петер Пріпутен зо женов, малярь Андрій Смолак, Директор Словацького інштітуту в Москві Ян Шмігула, куратор выставкы Андрій Смолак мол. Жрідло: Международная академия культуры и искусства. На фотоґрафії в статі: Образ Андрія Смолака. Жрідло: Galéria Andrej Smolák.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА