Акция для маґурской туристичной колибы – успішні проведена

На нашым портали і в тыжденнику ЛЕМ.фм+ інформували сме недавно, же туристична колиба на Маґурі Маластівскій єст в потребі. Такой од початку єй істнуваня, коли была збудувана в 1955 році, не мала порядного ремонту, зато горозило ій запертя, чым стратила бы свою функцию як місце схороніня для туристів, ходячых по бескідскых путях. Опікуючий ся од осмох років колибом Гриц Вацек, новичан з лемківскыма корінями, рішыл зрыхтувати специяльний проєкт на сайті polakpotrafi.pl, То кравдфандінґовий порталь, на котрым, позыскуючы часом невеликы квоты, мож зобрати більшы пінязі на даяку конкретну ціль. Єдно, што ограничат збірку фінансів, єст тото, же кєд не поведе ся зобрати цілу жадану суму, грошы вертают до охочых спомочы ініциятиву. Окрем заявок на портали lem.fm, зобрали ся тіж фейсбуковичы, пошырюючы інформацию о акциі, а такой на сам вершок Маґуры, під будинок колибы, пришла редакция інформацийного проґраму Телеекспрес з Польской Телевізиі.

Тым разом інтернавты не завели. Уж по парох днях акциі орґанізаторы збіркы заявили, же мают половину вымаганых пінязів, а днес (03.08.2016) на наш е-майль пришла відоміст, же повело ся зобрати цілу суму, т.є. 50.000 зл. Тым способом, уж неодолга – як пишут опікуны колибы – в вересни/септембрі 2016 р. зачнут ся ремонтовы працы. Акция збераня фондів на туристичну колибу тырват дальше. Тепер, кєд поведе ся зобрати дальшых 25.000 зл, орґанізаторы выпосажат єй в середині.

Каждий, хто вплатит навет найменьшу квоту, достане дрібний дарунок од орґанізаторів збіркы.