Аеропорты Свідник, Ужгород, Ніредьгаза і Сату Маре в меджінароднім проєкті

Свідницькый аеропорт, котрый є моментално хоснованый головно на шпортове і рекреачне літаня, буде партнером в меджінароднім проєкті вєдно із аеропортами в Ужгороді, Ніредьгазі і Сату Маре.

Як про аґентуру TASR повіла пріматорка міста Свідник Марцела Іванчова, в пятніцю 12-го фебруара 2021-го року з директором Реґіоналной Іноваційной Аґентуры в Кошыцях Владиміром Хлебом і ректором Технічной універзіты в Кошыцях Станіславом Кметьом підписала меморандум о співпраці в меджінароднім проєкті.

Проєкт з назвов Carpathian Small Aviation быв схваленый в рамках проґраму HUSKROUA (Hungary – Slovakia – Romania – Ukraine). Є то проєкт штирьох споминаных аеропортів у Свіднику, Ужгороді, Ніредьгазі і Сату Маре. Ціна проєкту є майже 148 тісяч евр.

Головным цільом проєкту є звидительнити турістічны, бізнісовы, освітні і інвестічны можливости окремых реґіонів, створити маркетінґовы актівности, котры будуть презентовати реґіоны в цілій Европскій унії і у вшытык участных країнах.

„З другого боку має принести і можливости комерчного выужытя. Видиме ту великый потенціал у співпраці на далшых проєктах, котры бы могли помочі при розвитку інфраштруктуры вшыткых аеропортів. Свідницькый має статус публічного внутрішньодержавного аеропорту. Як єдиный на Словакії має асфалтову драгу з довжков 1200 метрів. Довшу має лем аеропорт в Жіліні. Я барз рада, же аеропорт в такім малім місті може розвивати свій потенціал,“ повіла Іванчова про аґентуру.

За їй словами аеропорт співпрацує з Технічнов універзітов у Кошыцях при тренованю новых пілотів.

Выступами з проєкту будуть сполочны актівности – тренованя пілотів, презентація аеропорту і цілого реґіону, пропаґачны матеріалы, але принесе то місту і грошы з хоснованя аеропорту „Потенціал проєкту є і в можливостях далшых проєктів, котры будуть прямены на добудованя інфраштруктуры аеропортів, што про аеропорт у Свіднику є барз важным,“ додала Іванчова.

Жрідло фотоґрафії: Svidník/FB.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА