В Ужгороді засідав Русиньскый културолоґічный клуб

В суботу 28-го септембра 2019-го року в конференчній салі Центра култур народностных меншын Закарпатя в Ужгороді проходило засіданя членів Общественной орґанізації Русиньскый културолоґічный клуб.

Як інформовав голова орґанізації Юрій Шиповіч, засіданя было розділене на дві части – робочу і семінар присвяченый юбілеям русиньскых діятелів Александра Павловіча, котрого 200 років од народжіня сьме собі недавно припомямули, і Евменія Сабова, од котрого народжіня минать 1-го октобра 160 років.

Обговорили планы на слідуючій період

В першій части участны выслухали інформацію, котру подав Шиповіч о реґістрації Русиньского културолоґічного клубу.

Як далше голова орґанізації пише, на засіданю обговорили і пропозіції лоґотіпа, котры были зроблены Маріаном Токарьом, якый є і заступником головы орґанізації, і Ярославом Бланарьом. Рішіня о тім, яка буде офіціална верзія знаку орґанізації участны переложыли на слідуюче засіданя.

Членове в суботу окрім того встановили напрями роботы свого клубу, зробили комісії і обговорили план роботы на слідуючій період, кінця 2019-го і зачаток 2020-го року.

Семінар присвяченый будителям

В другій части, як вже было спомянуто, проходив семінар на тему Євменій Сабов і Александер Павловіч у народній памяти.

Із своїма лекціями выступали Юрій Шиповіч, далше Юрій Продан, котрый є головов Закарпатьского областного научно-културолоґічного общества імени Александра Духновіча, доцент Ужгородьской націоналной універзіты (УжНУ) Маріян Токарь і докторанд Катедры політолоґії і державного управліня УжНУ Михаіл Зан.

„Окремов честьов про членів клубу была навщіва засіданя ведучой одділіня Карпатика Научной бібліотекы УжНУ Марії Чорій, котра зробила про участників префайну выставку книжковых фондів, котры дотуляють ся даной темы,“ інформовав Шиповіч.

Тот участным представив і свіжу публікацію під назвов Алманах днешньої русинської літературы, котрый быв выданый Русиньскым културолоґічным клубом вєдно із Закарпатьскым областным научно-културолоґічным обществом імени Александра Духновіча. В алманаху мож найти найновішы творы сучасных русиньскых прозаіків, поетів і драматурґів із Підкарпатя.

Жрідло Фороґрафії: Юрій Шиповіч

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА