Сумар дня на 27. вересня/септембра 2019 р.

Приносиме Вам сумар медияльной ґрупы ЛЕМ.фм на ден 27. вересня/септембра 2019 р.

Новый вид Музею Енді Варголя

Музей Едні Варголя в Меджелабірцях змінит свій зовнішній і внутрішній вид. Обєкт буде перебудуваный, так жебы одповідати стандардам дізайну ХХІ ст. Зліпшена буде і функцийональніст будинку. Бесідує ся о двох вариянтах реконструкциі, туньшым і дорожшым. На днях словацкы власти будут про тото рішати, поінформувал на выіздовым засіданю 17. вересня/септембра в Ґіралтівцях премєр Петер Пеллеґріні. Проєкт зовнішньой фасады буде навязувал до такой, яку має парижскій Центр Помпіду. Буде то конструкция, котру буде мож хоснувати на розмаіты способы, вчас ріжного рода варштатів, тіж як простір, де будут вказуваны мультімедияльны файлі ци відео. Нова фасада даст можливіст і хоснуваня стріхы як окремой зоны. Заміріньом є, жебы будинок музею по перебудові был сам в собі артистичным твором, збудуваным на мультімедияльности, котра была так характерна для короля поп-арту – Варголя. Ремонт фінансуваный буде словацком владом.

Про сакрум і профанум в Новым Санчы

Пята едиция Конґресу Культуры Реґіонів буде присвячена сферам сакрум і профанум і піднимала буде темы звязаны з нематерияльном культуровом спадковином. Головным орґанізатором подіі є Малопольскій Центр Культуры Сокіл в Новым Санчы. Од 15. до 18. жолтня/октобра місто гостило буде парусот реґіоналистів, знавців, любителів народной культуры, артистів, науковців та кєрівників фольклористичных ансамблів з цілой Польщы. В рамках панельовых дебат і варштатовых занят підниманы будут темы звязаны з выражаньом духа, сенсуалізму в народній штуці, з ритуалізом, бесіда буде про тото, як днес спілістнуют реліґія і фольклор і ци сакралізация спадковины традицийной культуры служыт дідицтву. Вчас інавґурациі конресу розданы будут одзначыня Міністра Культуры та Малопольского Воєвідства заслуженым для захованя і розвитку культровой спадковины Малопольщы.

«Малопольскє Село 2019»

Днес на обшыри Ґалицийского Місточка в Новым Санчы роздадут нагороды Малопольского Воєвідства в конкурсі «Малопольскє Село 2019». Серед выріженых є і лемківска місцевіст. Званя Найкрасшого Малопольского Села признано Заваді в ґміні Тарнів, нагорода то 60 тис. зл. Новаторскым Малопольскым Селом остал Милик з західньой части Лемковины, як нагороду село отримало 60 тис. зл. Серед дальшых нагородженых і выріжненых є і Кобылянка. Цілю того конкурсу є выріжнити шотыства і іх жытелів, якы активні діют для збільшыня атракцийности малопольского села, при захованю просторового і архітектонного порядку характерного для культуровой спадковины села. Высоко оціняны были локальны ініциятивы, задачом якых было укріпляти локальну достоменніст і додатково інтеґрувати жытелів і будувати патріотичну та історичну свідоміст. Розданю нагорід товаришат варштаты традицийного ремесла, деґустация страв реґіональной кухні та артистичны выступы.

Потягом до Крениці з Кракова ци Ґдині

Од 15. грудня/децембра того рока будут урухомлены три новы желізницьовы получиня до Крениці. Два з них будут штоденно курсувати і сут то: потяг «Малопольска» на трасі Ґдиня-Крениця-Ґдиня та потяг «Погіря» з трасом Краків-Крениця-Краків. Сезонове получыня «Малиновскій» обслугувало буде трасу з Кракова до Крениці і назад. Тот потяг буде курсувал в суботы, неділі і выбраны дни. Новы желізницьовы получыня то оферта не лем для курортників Ґміны Мушына та Крениця. Орґанізаторы перевозів надіют ся, што получыня хоснувати будут студенты, туристы і жытелі той части Малопольщы, якы мусят доізджати до роботы до більшых аґломераций.