Сумар дня на 16. вересня/септембра 2019 р.

Приносиме Вам сумар медияльной ґрупы ЛЕМ.фм на ден 16. вересня/септембра 2019 р.

Ансамбль ПУНА глядат новых членів

Піддукляньскій Умелецкій Народный Ансамбль з Пряшова, єдиный такій професийный русиньскій фольклорный ансамбль, прийме новых членів. Колектив оголосил рекрутацию на членкыні хору та членів мужской танцувальной ґрупы. Конкурсовы переслуханя одбудут ся 26. вересня/септембра т.р. на балетовій сали в театрі Йонаша Заборского в Пряшові. Переслуханя зачнут ся од 9.00 год. Выграна в конкурсі то великє выріжніня, а часом аж і сполніня мрий, особливо для тых, якы сут любителями народного танця. Особы, котрым ся поведе быти членом ПУНА, будут мати можливіст гуляти народны танці на найвызшым, професийным рівни, будут мочы выступувати на великых, світовых сценах. Приналежніст до ансамблю дає не лем материяльний хосен, але і дозвалят розвинути своі пасиі, а тіж вказати русиньскій фольклор.

Поіхат першый потях на трасі Ясло-Крениця

Уж офіцияльні подано, же урухомлене буде желізницьове получыня Ясло-Крениця. Фірма Малопольскы Желізниці рішыла, што першый пробный курс потягу, котрый вкаже ци получыня тото буде тішыло ся заінтересуваньом подорожных, одбуде ся 28. вересня/септембра т.р. Хоц то лем єден курс, дає він надію, же в будучности потягы на тій трасі курсувати будут реґулярні. Ідея урухомити желізницьове получыня на трасі Ясло-Біч-Ґорлиці-Струже-Ґрибів-Новый  Санч-Крениця явила ся уж два рокы тому. З початку проєкт не нашол узнаня серед самоурядовых власти малопольского і підкарпатского воєвідств. Допіро в тым році Адам Філят, координатор кампаніі kochamkojej.pl вернул до давной концепциі і враз зо спілпрацівниками піднял одповідні крокы в ціли єй зреалізуваня. Написано внескы з аналізом хосенности, якы плынут з того получыня, котры пак трафили до маршалківскых урядів обох воєвідств. Была тіж проведена інтернетова анкєта, в котрій аж 95,88% респондентів оцінило думку  получыня Ясло-Крениця-Ясло як добру. Што веце, 95,82% задеклярувало хоснувати тото получыня, кєд явит ся оно в розкладі ізды, што влинуло на прихыльны рішыня самоурядовых власти та Малопольскых Желізниц. До одбытя подорожы потягом заохочают тіж ціны білетів – напр. з Ясла до Креииці буде мож поіхати за 12,50 зл.

Фольковы Стрічы на пастырскым пути в Ославици та Великым Вислоку

Ґмінный Осередок Культуры в Команчы просит на закінчыня пастырского сезону в фольковым стилю, значыт ся на традицийну волошску колибу. Фольковы Стрічы на пастырскым пути одбудут ся 28. вересня/септембра в Ославици та 29. вересня/септембра в Великым Вислоку. В Ославици проґрам зачне ся о 12.00 год. тромбітами. Гості привитаны обудут через бачу, одбудут ся тіж артистичны выступы. Выступлят фольковы ансамблі, а окрем того будут тіж гры і забавы для діти, напримір стріланя з луку. І любителі ремесла ци реґіональных продуктів найдут дашто для себе. В проґрамі єст тіж зілярска прогулька, выстава пастырского нарядя та фотоґрафічна выстава враз з варштатами, пак выступит звізда вечера, ансамбль Валасі. О ден, в Вислоку Великым подія зачне ся о 12.00 год. богослужыньом в місцевій церкви св. Онуфрия. Зас выступлят фольковы ансамблі, што веце, буде мож взяти участ в варштатах ремесла ци музичных варштатах творіня карпатской капелі, обізрити показ рыхтуваня овечого сыра, а і того дня буде фотоґрафічна выстава та ярмак. Того дня звіздом вечера буде Оркєстра св. Миколая.

ПКП Інтерсіті пожычыло од ЕІБ 1 млд зл

12 вересня/септембра тр. ПКП Інтерсіті пожычыло од Европейского Інвестицийного Банку 1 млд зл. Вдякы кредитови 233 млн евро мают быти куплены електричны локомотивы, пасажерскы ваґоны і інча інфраструктура. Має тото поліпшыти крайовы і медженародовы получыня до Чех, Словациі, Німец, Мадяр і Австриі. Проєкт буде наступным елементом підпоры банку для модернізациі сектора транспорту в Польщы, а предовшыткым желізницьового транспорту. Долготермінова стратеґія модернізациі желізниц має позитивне влияня не лем на якіст обслугы, але і климат та середовиско, завдякы спераню зменьшаня доровогого транспорту, збільшаючы желізницьовый.