Послідній вікенд перед Филипівком

За юлияньскым календарьом, проходит послідній вікенд перед Різдвяным постом, званий по русиньскы Филипівком (од праздника св. Филипа, припадаючым на 27. листопада, ден по котрым ся зачынат). То уж остатні хвилі, коли можете выбрати ся на пущаньову забаву.

Днес, мате змогу зайти на дві подіі. Найперше до Пшемкова на VIII Стрічы з Лемківском Культуром, якы зачнут ся о 16.00 год. в Пшемківскым Осередку Культуры. Выступлят ансамлбі Ластівочка (як ґазда, бо то ансамбль з Пшемкова), Ластівчата, Припадок, Вудвор, Ліґницка Земля і Файна Ферайна (більше – за мотузком).

А тот, хто хоче не лем слухати і обзерати, а і погуляти – най прийде до ліґницкого кружка Стоваришыня Лемків при ул. Зофіі Коссак на забаву. Буде там мило і весело, можете тіж, як заявляют на фейсбуковым сайті орґанізаторы, дашто выграти в рамках лотериі.

Вчера зачали ся дві подіі в горах, котры протягнут ся до заране. Першом являт ся ювілейна Х Стріча любителів Низкого Бескіду, в котрій бере участ наша редакторка Наталія Малецка (чытайте ту) і, надієме ся, принесе нам до радия реляцию з той подіі, а далеко в Тисній зачал ся фестіваль Крейзі Ґерлс, котрого головном темом сут Русины (а радше Русинкы) – мати Енди Варголя – Юлия і друга Юлия (Дошна), котра о 18.00 год. представит репертуар з найновшого проєкту, котрий обнимат співанкы зобраны Оскаром Кольберґом. О тисняньскым фестівали прочытате за тым мотузком.

Хочеме здементувати деякы інформациі і освідчыти, же порталь lem.fm буде діял і перед, і по Филипівці. Ден і ніч. Осіню, зимом, ярю і літом. 🙂