«Слово» – 12 – та неділя по Сошествії Святого Духа – неділя, 9.00 год.

За Ісусом приходить молодый чоловік з барз важным вопросом. Што робити, жебы набыти вічный жывот?

Накілько не приходить, жебы Ісуса покушати, або жебы поїмати на слові, як то робили многы фарізеї і учітелі закона, но приходить щіро, Ісус йому давать одповідь. Кедь хочеш войти до жывота, дотримуй заповіді. Тот молодый чоловік ся звідовав: А котры? Коли Ісус одповів – не чуджолож, не крадь, не свідч фалшиво, люб ближнього, тот чоловік ся може в духу зарадовав. Тадь тото я дотримую од маленькости, та што іщі треба зробити навце? А уж ся чув якбы при воротах неба а думав собі, же Ісус му повість іщі даяку заповідь, котру він легонько може дотримати. Но приходить про одповідь, котру не чекав. Кедь хочеш быти доконалый, ідь продай вшытко і роздай бідным а будеш мати богатство в небі. Потім прийдь і мене наслідуй. Таку одповідь не чекав, засмутив ся і одходить од Ісуса.

Ісус видів, де быв проблем того чоловіка: быв привязаный ку богатству, а оно йому сперало, жебы посмотрив не лем ку небу, но і ку ближньому. Він формално дотримав заповіді, но Ісус од нього хоче, не лем формалне дотримованя, але правдиве од сердця. Прото подавать йому лік: ослободити ся од привязаности. Но такой го потішать, обіцять му богатство, котре не помине, то в небі. Но він уж якбы не чув. Одходить смутный.

Тото слово є важне і про нас. Видиме з єдного боку щіре прягнутя по вічнім жывоті, але кедь то выжадує якусь жертву, чоловік одрікать ся. А тыж видиме любов Ісуса, як не силиує никого. Давать лем раду: кедь хочеш войти до жывота… кедь хочеш быти доконалый… Зохаблать на чоловікови, яке буде його рішіня. Решпектує слободну волю чоловіка. І нам говорить тоты слова: кедь хочеш войти до жывота… кедь хочеш бити доконалый… Яка буде на то наша одповідь…? Слава Ісусу Хрісту!

В неділю, 8 септембра 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 8 септембра о 12.00 і 9 септембра о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА