Сумар дня на 30. серпня/авґуста 2019 р.

Приносиме Вам сумар медияльной ґрупы ЛЕМ.фм на ден 30. серпня/авґуста 2019 р.

Русиньскій Одпуст в селі Павлово на Мадярах

7. вересня/септембра грекокатолицкы Русины на Мадярах будут празднувати свій Русиньскій Одпуст в селі Павлово (тепер Шайовпалфала) в окресі Мішкольц. Вірны поклонят ся Чудотворній павловскій іконі Пресвятой Богородиці. Богосложыня очелит архієпископ гайдудорожзкій та митрополита Мадяр Його Преосвященство Филип (Кочіш). Участный буде і владыка Атаназ (Орос),  єпарха мішкольцскій. Свою присутніст потвердил Міклош Шолтес, державный секретар до справ реліґійных і нацийональных звязків Канцеляриі Премєр-Міністра. Грекокатолицка парохія в Шайовпалфалі, де ся каждого рока стрічат на одпусті русиньска соспільніст, записала ся до істориі тым, же находит ся там ікона Пресвятой Богородіці, котра од Рождества аж до 17. січня/януара 1717 рока слезила. Кроніка споминат, же хоц была в тым часі барз туга зима, капкы слез темночервеной фарбы не замерзали ани не сохли, хоц ікону поставили на цілу ніч коло пеца. Ікона трафила до римокатолицкой церкви в місті Яґер і аж по 265 роках повело ся одзыскати ікону до церкви в Павлові.

Рыхвалд і Мацина з водопроводом і каналізацийом

В Рыхвалді та Мацині Малій сфіналізувано інвестицию за більше як 3,5 милийона злотых. Без підпоры з Європейского Союза та Воєвідского Фонду Охороны Середовиска не могло бы тото ся одбыти. 26. серпня/авґуста війт ґміны Санкова, Малґожата Малух, разом з директором ґмінного Закладу Комунального Ґаздуваня, Ґжеґожом Носальом, офіцийні отворили водопровід в Рыхвалді та каналізацию в Мацині Малій. Ціліст інвестициі обняла побудуваня унятя воды та водопроводу в Рыхвалді та стациі очыщаня воды з контенером на чысту воду. Водопровід буде достарчал воду для 57 ґаздівок на обшыри Рыхвалду. В Мацині побудувано каналізацию з очыщальньом і штырьома перепомповнями.

Професор з Відня про лемківскых поетів

О тыжден, в вікенд 6. і 7. вересня/септембра в Команчы одбуде ся 11. едиция Гарасиміяды, пн. На стежках Краіны Лагідности. Подія дедикувана є особі Єжы Гарасимовича і його поетицкій творчости. В пятницю буде мож выслухати штырьох прелекций. Проф. Алюа Вольдан з Віденьского Університету буде бесідувал про Єжы Гарасимовича та лемківскых поетів, др Алан Вайс з Вроцлавского Університету зреферує поетицкє жытя Гарасимовича, Марія Костельняк оповіст про вершы, співанкы Грасимовича, Бельона та інчых, зато Роберт Ксєнжопольскій омовит портреты рослин в творчости Гарасимовича. В проґрамі тогорічной Гарасиміяды є тіж спектакль учеників Основной Школы в Лупкові, презентация конкурсовых плястичных прац, будучых інтерпретацийом вершів Гарасимовича та музичны выступліня. В другій ден подіі буде зложыня квітя під памятником поеты на Выжній Перегыбі і рецитация вершів Гарасимовича.

Вересен/септембер в Рускым Керестурі

Русиньскє здружыня Руска Матка зо Сербіі в вересни/септембри буде орґанізувало три подіі, серед котрых першыраз пройде Подобова Кольонія Рускій Керестур 2019. О орґанізациі подіі бесідувано на стрічы Управной Комісиі Руской Маткы 24. серпня/авґуста в Рускым Керестурі. Переаналізувано та оцінено тіж 15. Світовый Конґрес Русинів, якій проходил в липци/юлию т.р. в Старій Любовни на Словациі. Комісия омовила рыхтуваня до 4. едициі Стрічы Поетів, Літературных і Музичных Творців, котра одбуде ся 21. вересня/септембра в Керестурі. Бесіда тыкала тіж 4. едициі фільмового фестівалю «Русин Фільм Фест», якій одбуде ся 27.09 в Шыді. Окрем выміненого на стрічы презентуваный был новый номер часопису «Руснак».