Кампанія МАіЦ – уж неодолга

Як дознали сме ся од працівників Міністерства Адміністряциі і Цифризациі, на другій тыжден стартує загальнопольска кампанія, якой цілью являт ся збільшыня присутности меншыновых і реґіонального (кашебского) языка в публичным просторі. Акция звязана єст з ратифікуваном Польщом в 2009 р. Европейском картом реґіональных та меншыновых языків.

Кампанія направлена єст на ріжны ґрупы: самоуряды – жебы знали, якы мают обовязкы з причыны підписаной Европейской карты, учытелі – жебы промували знаня о меншыновых/реґіональных языках, родиче – жебы посылали своі діти на лекциі материньского языка, працодавці – жебы пошырювали знаня і хоснуваня тых языків в економічній і публичній обшыри.

МАіЦ надіє ся, же акция принесе збільшыня знаня самоурядів о правах языковых меншын, але і хосен, якій іде з іх вчыня, збільшыт кількіст діти, якы вчат ся меншыновых языків, пошырит знаня о меншыновых языках серед люди, збільшыт присутніст меншыновых языків в самоурядах і іх ролю як помічных языків, а при тым принесе більше пропозиций двоязычных назв міст і сел. Загальні – міністерияльна кампанія має збільшыти присутніст та хоснуваня меншыновых і реґіонального языка в публичным просторі.

Кампанія Міністерства Адміністрациі і Цифризациі буде сперана інформацийным сайтом jezyki-mniejszosci.pl (на днес іщы недоступний). Окрем того, МАіЦ выдало і выслало уж бюлетины, ріжны для поєдных ґруп адресатів. Тоты, презначены для меншыновых орґанізаций в лемківскым языку, презентуєме за тым мотузком.

Горды сме з того, же і мы, єдине лемківскє радийо ЛЕМ.ФМ, помагаме зрыхтувати тоту акцию, о якій більше дознате ся в посліднім тыжни листопада 2014 р. на сайті промуючым кампанію.