Сумар дня на 20. серпня/авґуста 2019 р.

Приносиме Вам сумар медияльной ґрупы ЛЕМ.фм на ден 20. серпня/авґуста 2019 р.

Збірка грошы на ремонт цмонтеря в Лабовій

Старый лемківскій цмонтір в Лабовій, котрый находит ся при тамтышній церкви з 1784 р., попадат в штораз більшу руіну. З той тіж причыны Лемківскій Ансамбль Пісні і Танця «Кычера» разом зо Стоваришыньом Маґурич, при підтримці Стоваришыня Лемків і Музею Лемківской Культуры в Зындрановій, рішыли го одремонтувати. Є то близко гектарова некрополия з вельома великыма камінныма крестами, з котрых більшіст єст уж барз ушкоджена. Проєкт в першым етапі реалізуваный буде без державных дотаций, а основом буде робота вольонтерів і даткы любителів. В звязку з тым думкодавці акциі просят о фінансову підпору, завдякы котрій буде мож купити будовляны материялы та підримати вольонтерів на місци. Так само важна є безпосередня участ в проєкті, зато прошены сут вшыткы особы, котры хотят помочы. Грошы вплачати мож на страні zrzutka.pl. Першый етап робіт плянуваный єст на час од 2. до 6. вересня/септембра тр. Цілковитый кошт самых будовляных материялів рахуваный єст на 25 тис. зл. В припадку коли зобрана буде більша як потрібна квота, грошы переданы будут на дальшы етапы ремонту або на ремонт наступного лемківского цмонтеря.

Пожар в Высовій блиско церкви св. Михала Архангела

17. серпня/авґуста в Высовій был пожар, котрый міг загорозити памятковій церкви св. Михала Архангела. Стражакы бороли ся з огньом 10 метрів од святыні. Сиґнал о тым, же єст пожар, пришол пару минут по 19.00 год. Горіло піддаша приватного будинку. До акциі, окрем місцевых стражаків, рушыли і ґрупы пожарників з Ґорлиц, Устя Руского, Брунар, Смереківця, Ґладышова і Ганчовой. Жытелі будинку здоляли самы лишыти загорожене місце іщы перед тым, як приіхала поміч. Нихто не потерпіл. Будинок, в котрым явил ся оген, сусідує з церквом св. Михала Архангела, яка вписана была до реґістру памяток 24. лютого/фебруара 1986 р. і находит ся на Малопольскым Шляку Деревяной Архітектуры. Недавно закінчено ґрунтовный ремонт храму. На щестя стражакы опанували ситуацию і церков не была ушкоджена.

«Дикы Столы – осін 2019»

Товариство Низкого Бескіду рыхтує уж другу в тым році реставрацию на лоні природы. Імпреза «Дикы Столы – осін 2019» тым разом одбуде ся 21. вересня/септембра. Є то циклична подія, вчас котрой мож ся стрітити на поляні в Ґладышові, жебы покоштувати розмаітых страв характерных для реґіону. Пікнікова атмосфера, зелена поляна в сусідстві смереків, сосен, буків, з видоком на верхы Низкого Бескіду. А на тій поляні ватры, польова кухня і найважнійше – дикы столы, прикрашены орябином і зільом. То вшытко спричынят, же люде чысленно приходят до Ґладышова. Рыхтуваны сут реґіональны, натуральны та просты стравы, м.ін. домашні сыры, кобасы, ориґінальны хлібовы смаровила, печены ярины, поливкы з горця, а тіж специяльны напиткы ци корінны компоты. Тота пленерова реставрация то не лем ідло, але і стріча, вчас котрой звучыт бескідска, гірска та лемківска музика.