Споможме ремонт цмонтеря в Лабовій

Фурт мож спомочы ремонт великого старого цмонтеря в Лабовій. Село до 1947 р. было єдным з найвекшых русиньскых сел на західній Лемковині. Єдном з памяток по бывшых жытелях єст призабытый теметів, на котрым соткы років были хоронены русиньскы мешканці Лабовой.

Фонды были збераны орґанізаторами ремонту на Лемківскій Ватрі на Чужыні. Тепер тырват інтернетова збірка, завдякы котрій початком вересня/септембра має пройти першый етап ремонту выбраных памятників.

Потрібны не лем грошы

Як інформуют орґанізаторы ремонту лабівского цмонтеря, цілковитый кошт самых лем будовляных материялів то приблизно 25 тис. зл. Першый етап прац плянуваный єст на час од 2. до 6. вересня/септембра тр. «Сут нам потрібны дві річы. Предовшыткым рукы до роботы, в рамках вольонтерства, але тіж фінансы, котры будут нам потрібны на материялы до одновы тых памятників, якы сут поламаны, барз запущены», бесідує Павел Ханас, єден з думкодавців акциі.

Проєкт в першым етапі буде реалізуваный без державных дотаций ци фондів. Прото барз потрібна єст поміч не лем бывшых жытелів Лабовой і іх потомных, але вшыткых розсіяных по цілым світі Лемків, котрым близка є памят про сохраніня як раз той части лемківской спадковины. «На днес маме лем част середків, але і так зачынаме тот ремонт», продолжат оптимістично П. Ханас. З зобраных фондів окрем будовляных материялів буде плачене бытуваня вольонтерів на місци. Хто бы мал дяку долучыти до ремонтовой команды, може ся приголосити до орґанізаторів.

Плянує ся, што в тым першым етапі побіт при фінансовій підпорі выремонтуваных буде од 4 до 5 памятників, але скорого ремотну потрібує аж 12 памятників. Головна збірка тырват тепер в Інтернеті, на сайті www.zrzutka.pl. На тот момент зобрано кус більше як 1 тис. зл з 5 тис., котры сут потрібны на першый етап. Деталі про вплачаня грошы найдете за прикликаным мотузком. Подаєме банковый рахунок, на котрый мож передавати добровільны пожертвы: (BNP PARIBAS) 75 1600 1462 0006 1797 0246 1040.

Орґанізаторами ремонту сут Лемківскій Ансамбль Пісні і Танця «Кычера» та Стоваришыня Маґурич при підпорі Стоваришыня Лемків і Музею Лемківской Культуры в Зындрановій.

Єден з більшых цмонтерів

Лабівскій теметів єст єдным з найбільшых цмонтерів на Лемковині, занимат близко гектар простору. Доднес захованых на ним єст вельо камінных крестів, котры за більше як сімдесят років не были нияк ремонтуваны. Більшіст з них єст міцно пошкоджена. То остатній момент, жебы ратувати материяльны памяткы з давной Лабовой.

Цмонтір находит ся недалеко муруваной грекокатолицкой церкви Покровы Пресвятой Богородиці. Лабова до ІІ світовой войны была єдным з богатшых сел в тій части Лемковині.

Першый запис про село походит в 1431 р. Окрем Русинів столітями Лабову заселяли і Жыды, а по великій войні і польскы осадникы. До 1939 р. прожывало ту 820 Лемків, 250 Жыдів і 190 Поляків. З початком войны німецкы нацисты зослали лабівскых Жыдів до ґетта в Санчы і до концентрацийных лаґрів. В 1940-1946 рр. більшіст лемківскых родин добровільно переселила ся до Совітского Союза. Тоты, што остали, были в 1947 році выселены в рамках акциі «Вісла».