В найблизшый вікенд 39. Лемківска Ватра на Чужыні

В найблизшу пятницю, 2. серпня/авґуста в Михалові на Нижнім Шлеску, зачне ся 39. Лемківска Ватра на Чужыні, котра буде горіла до слідуючой неділі.

Традицийна стріча розсіяных по західніх землях Польщы Лемків як каждого рока пропонує участникам богатый проґрам. Не бракне ани выступлінь знаных ансамблів, доповіди, річницьовых упамятнінь і інчых акций.

Ватру розпалит найстаршый жытель Михалова

Згідно з веденом традицийом, Лемківску Ватру на Чужыні все розпалят найстаршый Лемко з Михалова.

Подібні як в попередніх роках, Ватру розпалит Ярослав Шляхтич, уродженец Фльоринкы. В пятницю, по 19.00 год. при участи запрошеных гости, державных і самоурядовых власти положыт він оген під 39. Лемківску Ватру. Офіцияльны делеґациі зложат наперед квітя під таблицями, будучыма упамятніньом жертв акциі Вісла з 1947 рока.

Пятниця – проґрам богатый в упамятніня

В проґрамі на тот ден окрем выступлінь фольклорного ансамблю, діючого при Кружку Стоваришыня Лемків (СЛ) в Пшемкові, Лeмківскій Ансамбль Пісні і Танця (ЛАПіТ) Ластівочка, своі музичны пропозициі вкажут діти з Молодіжного Ансамблю Музичной Школы в Ліґници. Вечерню концертову част збогатят своіма концертами фолькова ґрупа Буракы з Вроцлавя, та ґрупа Клюб46. О забаву постарат ся капеля Водограй.

Проґрам в пятницю вечером буде богатый в упамятніня і споминову част. По концерті домашньой Ластівочокы, капітула СЛ передаст тогорічну Нагодору ім. Никыфора – Епифанія Дровняка. Піде она в рукы заслуженой на ниві лемківской культуры особы, котру публика познат в ден єй вручыня. При тій нагоді, в проґрамі орґанізаторы заплянували част посвячену 30. річници основаня Стоваришыня Лемків і часопису «Бесіда». Доповід выголосит м.ін. др габ. Олена Дуць-Файфер.

Субота од полудня

Суботній проґрам зачне ся в само полудне од спортовых змагань, якы будут проходити на ватровиску. О 14.00 год. зачне ся перша концертова част, в котрій презентувати будут ся лемківскы і заприязнены фольклорны ансамблі. В тій части передвиджено конкурсы співу, рецитациі і малюнку про наймолодшых. Так само дітячы ансамблі Ластівчата і Кычерка вкажут ся зо своіма концертами.

Од 17.00 год. зачне ся годинна перерва в проґрамі головной сцены. О тій порі в Бюрі Ватры одбуде ся дискусия на тему діяльности лемківскых орґанізаций в 1989-2019 рр. Прошены сут вшыткы, котрым близка діяльніст в обшыри лемківскых справ.

По перерві на сцені видіти буде мож фольклорны ансамблі Розтока з Рудной, Терочка з Ґорлиц, Кычера з Ліґниці. По них зачне ся пілгодинный конкурс знаня з нагоды 30. літя СЛ і «Бесіды».

Вечерню част зачне концерт вроцлавской ґрупы Coolбаба. Пак слідувати будут концерты ґрупы Надія зо Шпротавы і н’лем фольк з Вроцлавя. Наконец о забаву постарат ся капеля Троянда з близкого Хоцянова. По гулянці, над раном, коло 5.00 год. офіцияльно загашена буде 39. Лемківска Ватра на Чужыні.