Сумар дня на 29. липця/юлия 2019 р.

Приносиме Вам сумар медияльной ґрупы ЛЕМ.фм на ден 29. липця/юлия 2019 р.

Концерт «Музика ріжных культур – літо» в Брунарах

В найблизшу пятницю, т.є. 2. серпня/авґуста, в церкви св. Михала Архангела в Брунарах одбуде ся концерт названый наголовком «Музика ріжных культур – літо», якій одбуде ся в рамках Фестівалю 4 Поры Рока в Бескіді. Выступлят гушлярі, в тым лемківского походжыня, Мариюш Мончак і Міхал Байорек, а на фортепіяно заграт Роберт Адамчак. Артисты выконают творы знаных композиторів як нп. «Літо» Антония Вівальді, «Концерт на гушлі Е-дур» Йогана Севастияна Баха, «Аве Марія» Шуберта, «Гуцульску Фантазию» Терпелюка ци «Славяньскій Танец» Двожака. Єден з выконавців, др. Мариюш Мончак має лемківскы корені, його родиче походят з Береста. Тепер є знаным во світі гушлярьом. Як солиста і камералиста выступувал на найбільшых сценах світа. Єст основательом, директором і орґанізатором Медженародного Музичного Фестівалю «При джерелах», котрый орґанізуваный є на Лемковині. Концерт в Брунарах зачне ся о 19.00 год.

Парохіяльне свято в православній церкви св. Владиміра Великого в Креници

В минулу неділю, 28. липця/юлия, в православній церкви св. Владиміра Великого в Креници проходило парохіяльне свято. Торжественны божослужыня очелил архієпископ Паісий. Окрем пароха, отця Петра Пупчыка, пристуны были і отці Василь Ґалчык, Владимір Канюк, єромонах Максим – ігумен монастыря в Высовій, і отец Ярослав Ґрич. В тым році на креницкым кєрмешу церков заполнила ся по берегы, приіхали не лем Лемкы з околичных парохій, але і дальшых земель. Владыку повитали староста Петро Клинковскій і Яніна Ґрич, а пак місцевый парох. По богослужыню, з нагоды 30-літя монашества і 50. уродин владыкы Паісия, ювілятови вручено квітя і заспівано «Многая літа». Владыка подякувал каждому сцященникови осібно, а і дириґентови, Петрови Трохановскому, як і цілому хорови за прекрасный спів. В своій выповіди підкрислил, што в днешніх часах дуже річы одтігат од Церкви, але жебы не забывати о своім, о Богу, але і о рідній земли, жебы повертати в своі страны. Выразыл тіж надію, што і в Креници прыбуде парохіян. По Літурґіі вшыткых прыбылых запрошено до реставрациі, де продолжувано святкуваня.

«Культурне літо» в Плявци

4. серпня/авґуста в Плявци на Словациі одбуде ся подія п.н. «Культурне літо», де не бракне і русиньской культуры. Буде там презентация народного облечыня і традициі і зове ся «Нашы традициі – наше богатство». Культурный проґрам зачне ся о 14.00 год. в Центральным Парку в Плявци. Выступлят Фольклорный Ансамбль Плявчанка, Реґіональный Ансамбль Мшальничане, Фольклорный Ансамвль Соліварчан, русиньска співачка Ганка Сервіцка. Видіти буде мож і артистів з Польщы – реґіональный ансамбль «Жеґєстівска Буковина». Выступлят тіж Фольклорны Ґрупы Капушанчан і Розмария.