«Слово» – Шеста неділя по Сошествії Святого Духа – неділя, 9.00 год.

Днешнє слово євангелія нам говорить о выздравліню невладного чоловіка, котрого принесли ку Хрістови. Но Ісус наперед выздравлять його душу. Кедь йому говорить слова: Не бій ся, довіряй, одпущають ся тобі гріхы.

Но фарізеї не могли тото вынести, думали у своїх сердцях, же такы слова значать зневажаня Бога. Але Ісус знав, што і яка буря находила ся в їх сердцях, говорить їм: Чом мате такы планы думкы? А як доказ говорить: Жебы сьте знали, же можу так робити, встань. А невладный встав, взяв свою постіль і одышов.

Днешнє слово є адресоване нелем тому невладному, але каждому, хто приступує ку Хрістови зо своїма тагарями, гріхами. Ісус і нам говорить: Не бій ся, довіряй. Діявол перед гріхом, перед переступліньом Божой заповіди заспокоює нашу совість: Тадь то нич не є, Бог добрый, одпустить. Но по гріху указує на великость гріху і хоче привести нас до отчаяня – то є до ставу, коли чоловік не надіять ся чогось ліпшого. Но Бог перед гріхом указує на злобу гріха. А по гріху, жебы не падати до отчаяня говорить: Не бій ся, подь, укаж рану. Не падай на дусі, одпущають ся тобі хріхы. Прото не дайме ся баламутити злому, коли нас перед гріхом нагварять, коли злегчує гріх. Але не вірьме йому ани втогды, коли із людьской слабости ся пошпотиме, а він нас хоче привести до отчаяня. Вірьме прото Богу, котрый і тогды говорить нам: Не бій ся, довіряй. Я тя люблю, ты єсь дітинов Божов.

А так і днешнє слово най буде про нас напомянутьом і потіхов. Бог не одверьгне никого, хто приходить щіро ку Ньому. Ай кебы хоцьяк великым бы быв тот чоловік грішником. Бог говорить: Не бій ся. А Бог слово потверджує ділом: Встань.. Слава Ісусу Хрісту!

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА