Русиньска Ватра розгоріла десятый раз

В минулый вікенд, в днях од 19. до 20. липця/юлия, в Малым Липнику на Словациі проходила ювілейна Х Русиньска Ватра. Тогорічный ватряный проґрам был іщы богатшый од попередніх.

Вельо русиньскых ансамблів, ріжного рода выступліня, разом з танцувально-драматичным представліньом, не бракувало і презентациі русиньской літературы, платен, фільму про річницю прилучыня Карпатской Руси до Чехословацкой Републикы, але і атракций для діти.

Концерт Штеця і з лемківском музиком

Тогорічна ватра зачала ся в пятницю, 19. липця/юлия. Катарина Бабчакова оповіла о русиньскым весілю та выступуючій в ним символиці. Дальше, заспівал Штефана Штець враз з ґрупом Горнад, котра є клясичном цимбаловом музиком, але тіж специяльным гостьом – ґрупом Столичного Джывкы, котра одспівала співанкы з Великого Липника.

Концерт Штеця притягнул богате чысло люди. Публика не хотіла пустити го зо сцены, так концерт ся дакус передолжыл. На сам конец співак спомнул про Русинів з Лемковины, повіл дакус о смутній істориі Лемків, Акциі Вісла, о тым, што вельох по выселіню уж ся не вернуло. Звернул увагу жыючым в горах, на своій земли, жебы тішыли ся тым, што мают, де жыют, бо не вшыткым єст тото дане. Штець заспівал і 2 лемківскы співанкы, в тым еміґрантску пісню “Полетіл бы-м на край світа”. Так тіж в ніч над липницкым і лемківскым берегом Попраду несла ся традицийна русиньска музика.

Слідуючо, запрошено прибившых ватрян на лекцию танця, котру повели Шпеко Сабол враз з Катарином Бабчаковом. Того рока інструкторы вчыли двох танців з села Ливовска Гута, черяного і чардаша. Цілый простір заполнил ся людми. До танця пригрывал фольклорный колектив Горнад, котрый пак заграл і забаву. Того дня не бракло і акордеоністів, котры своім граньом і співом веселили ватрян.

Богатый суботній проґрам

Другій ден Ватры зачал ся грекокатолицком Божеском Літургійом, котра того рока правлена была на ватряній обшыри. Фольклорна част выстартувала о 16.00 год. На початку вказано проґрам «Русиньскє Весіля», в котрым выступили ансамблі Барвінок з Камюнкы, Верховина зо Старой Любовні, Тріо Кантар з Прагы та ґрупа з Малого Липника. На концерті «Вечер русиньскых голосів» выступило Русиньскє Тріо, участникы шов словацкой державной телевізиі «Zem spieva».

Вечером, на сцені вказаный был танцувально-драматичный проґрам під наголовком “Оптациі” в выконаню двох колективів – Горнаду з Кошыц і Рутеніі з Братиславы. Было то представліня о оптациях Русинів з Чехословациі по другій світовій войні. Тоты два ансамблі зрыхтували в 2018 р. своі представліня на тоту тему, Рутенія проґрам п.н. «Земля обіцяна», Горнад – «Справы, што ся діют». Фраґменты тых представлінь споєно в єдну ціліст і так зродил ся веце як годинный проґрам, котрый вказаный был на ватряній сцені.

В тым році на ватрі зрыхтувано і другы проґрамы в ареалі – презентацию книжок і платен про діти та промоцию фільму Янка Липиньского п.н. «В кліщах великых держав». Видіти мож было і різбы Йосифа Міхні з Якубян. По 22.00 год. традицийно розпалено ватру, а дальше уж мож было бавити ся при народній музиці Радослава Кертіса.

Позерайте долов на знимкы з ватры.