В неділю пікнік лемківской еміґрациі

В найблизшу неділю, 23. червця/юнія 2019 р., в американьскым селі Гартсдейль близко Йонкерсу пройде шоровый Лемківскій Пікнік, якій Карпаторусиньскій Центр «Лемко Голь» орґанізує каждого рока близко Русаль. Так же єст він приниманый через участників як «русальный» пікнік, хоц тогорічны Зелены Свята проходили такой тыжден перше.

Пікнік лемківской еміґрациі на східнім берегу ЗША то за каждым разом нагода на стрічу родаків з Йонкерсу, Ню Йорку і інчых меньшых місцевости. Пікнік робиме прото, жебы нашы люде ся довєдна зышли, а і жебы молоды ся запознали, бесідує Андрий Медвід, родак зо Ждыні, якій од років прожыват за океаном. Істория Лемківскых Пікніків при «Лемко Голю» єст так само повязана з реактивацийом того культурного центру, якій своі найбільшы успіхы мал в другій половині минулого столітя. Тот пікнік зачали робити все на Русаля. То єст давна традиция «Лемко Голю», одколи го побудували. Пікнік был орґанізуваный долгы рокы. Пак, коли побудували «Лемко Парк» в Монро, Ню Йорк – на Русаля гын зачали ся пікнікы. Тот пікнік, з того што люде оповідают, был барз великій. Люде ся зъізджали з Пенсильваніі, Ню Джерзі, Конектікет ачий з Канады приходили. Вшыткы, што мали коріня з Карпат – продолжат оповіданя істориі А. Медвід.

Днешні пікнікы то стріча парох поколінь. Приходят представникы найстаршой ґенерациі, котры часто родили ся іщы на Лемковині, або в інчых частях Карпатской Руси. На подіі все радо споминают на Старый Край, одкале або прямо еміґрували як діти з родичами до Америкы, або уж по выгнаню, зо західніх земель подавали ся за океан, глядаючы ліпшого місця во світі. Самособом, част з тых люди то діячы старого «Лемко Голю», котрый был не лем великом орґанізацийом, але і місцьом, будівльом в Йонкерсі, в якій проходили вшелеякы ініциятивы присвячены культурі Лемків.

«Лемко Голь» і так робил свій меньшый пікнік в Йонкерсі, але так само приходили люде з ріжных части Америкы. Не был то уж так великій пікнік як тот в «Лемко Парку», але традиция была підтримувана. Вартат спомнути, што все го робили в інчым гасі, як тот в «Лемко Парку». По проданю «Лемко Голь» через пару років не было пікніку, а потім, як ся сотворил новый заряд і зачал провадити «Лемко Голь» дале, рішыли сме вернути до той традициі і будеме робити пікнікы. Уж добрых пару років, рік-до-рока орґанізуєме пікнік, на жаль він єст на Русаля, з ріжных причын, але стараме ся і будеме ся старати, жебы тоту традицию продолжати, коментує респондент. Лемко Голь за причыном планной фінансовой ситуациі і зменшаня ся чысла членів мусіл быти в 90. роках ХХ ст. проданый. Од парох років тырват його постійна реактивация, за котру взяла ся молодша ґенерация діячів. Іх ціль – притягнути як найбільше чысло молодых, штобы плекати серед них лемківску культуру.

Успіх Лемківского «русального» пікніку єст достеріганый голым оком. Каждый рік приходит веце участинків. Як реляцийонує головный орґанізатор, А. Медвід, люде приходят головно прото, жебы стрітити друг-друга. Декотры не видят ся за цілый рік, аж ту на пікніку ся сходят. Люде переважно бесідуют о старых часах, о теперішнім лемківской еміґрациі. На тогорічній подіі буде мож посмакувати лемківскых страв, поспівати ай пограти в футболь ци волейболь. Деталі чытайте на залученым афішы.