Кычера з Кольберґом. Фотореляция з Королівского Замку

Лемківскій Ансамбль Пісні і Танця Кычера з Ліґниці уж другіраз в своій понад 25-літній істориі был нагородженый престіжном нагородом ім. Оскара Кольберґа. Кычера отримала оцініня за заслугы для народной культуры. Ґаля переданя оцініня одбыла ся 30. мая 2019 рока в Королівскым Замку в Варшаві, а пак і пленеровый концерт лавреатів.

Лемківскій ансамбль был оціненый в катеґориі фольклорных ансамблів, а оцініня признане было за музику і танец. Ґрупа нагороду одобрала з рук віцепремєра, Міністра Культуры і Нацийональной Спадковины – Пьотра Ґліньского. Присутны были і інчы міністры, представникы польского парляменту і парох інчых вызначных інституций. Нагорода ім. Оскара Кольберґа то такій «Оскар» в сфері народной культуры, реляцийонує веудчый ансамблю Юрий Стариньскій. Вартат підчеркнути, што Кычера є уж другій раз лавреатом ноной нагороды.

В 1995 р. доцінены были гудакы ансамбльовой капелі. Серед них нашли ся нежыючы уж музиканты, якы памятали іщы стиль давного граня на Лемковині, Петро Гойняк, Михал Олеснєвич, Семан Гопей ци Михал Коляр. Серед інчых лавреатів нагороды звязаных з лемківском культуром спомянути мож на проф. Романа Райнфуса, др. Уршулю Яніцку-Кшывду, Етноґрафічный Музей ім. Северина Удзєлі в Кракові ци Оркєстру св. Миколая. Ведучый звертат увагу, што признаня нагороды то старунок про добро ансамблю не лем тепершініх членів, але вшыткых люди, якы за цілу його історию в колективі танцували, співали, грали в капели, або занимали ся технічно-адміністрацийныма справами.

Як інформує Ю. Стариньскій, нагорода для ансамблю має не лем вымір материяльный, фінансовый, але і шыршый для цілой лемківской меншыны в Польщы. […] то была і маніфестация для нас. Нашой достеменности. По перше, Кычера отримала нагороду в найбарже престіжній катеґориі, ансамблів пісні і танця […]. Але то была тіж нагода, жебы стоячы око-в-око з віцепремєром і Міністром Культуры і парома інчыма особами, котры значат штоси в тій державі, жебы просто повісти: мало нас не быти. Сімдесят два рокы тому нас преселено, выгнано прото, жебы знищыти і наш нарід, але і нашу лемківску культуру. А тепер ту стоіме, в тым місци, так важным для польской державы як Королівскій Замок в Варшаві і одбераме нагороду за тото, же сме ся не піддали, додає Стариньскій. Самособом, звертат увагу, што перед семома декадами найвысшы польскы власти дали приказ на переселіня Лемків, што довело до траґічных наслідств, а днес теперішні власти символично признают першорядне оціня лемківскій меншыні і заєдно доціняют нацийональну спадковину нашого народу.

Лист од премєра Матеуша Моравєцкого одчытал шеф політичного ґабінету Марек Сускій. Премєр написал, што будує го переконая, же Польща без народной культуры не мала бы свойой душы, а розмаіта реґіональна культура має велику силу і характер. Премєр підчеркнул, што соспільсто має обовязок дбати на плеканя нацийональной культуры.

Ведучый Стариньскій на ґали забрал голос од імене вшыткых нагородженых, дякуючы капітулі за признане оцініня і дізріня вартости лемківской культуры. Ансамбль дал коротку презентацию проґраму, а по офіцияльній части на вечер на подворци Королівского Замку одбыл ся пленеровый концерт вшыткых лавреатів.

Окрем отриманя нагороды, подорож до Варшавы принесла і інчый, покля што неформальный успіх. Присутны урядникы, специялисты од культуры і фольклору запропонували спільне діяня ансамблю з Міністерством Культуры і Нацийональной Спадковины і інчыма выспециялізуваныма інституциями в просторі заініциювати стараня вписати елементы нематерияльной культуры Лемків до Листы Світовой Спадковины Юнеско. В тій справі має быти покликаный специяльный ансамбль, до котрого мают быти запрошены власти Кычеры.

фот. материялы ансамблю Кычера