Словацька влада схвалила Справу о позіції і правах народностных меншын

Як інформовав офіціалный сайт Уряду уповномоченого влады Словацькой републікы про народностны меншыны, словацька влада на своїм засіданю в середу 29-го мая 2019-го року схвалила Справу о позіції і правах народностных меншын за період років 2017 – 2018, котру приготовив Уряд уповномоченого.

То за порядком вже шеста справа, котра сумарізує дотеперішній розвиток в окремых областях дотримованя прав членів народностных меншын, описує области, в котрых пришло ку проґресу, но і тоты, в котрых затля суть недостаткы. Документує актуалный стан в области прав членів народностных меншын, і в области їх партіціпації на рішіню діл, котры ся їх дотуляють.

Попередні рокы были з погляду членів народностных меншын вынятково вызначны, пише ся в пресовій справі, головно в повязаня з приятьом стратеґічных і концепчных документів з леґіслатівныма змінани, котры дотуляють ся їх позіції і прав.

Векшы компетенції, фонд, школство

„Пошырила ся компетенція уповномоченого о можливость передкладати пропозіції в рамках творіня леґістлатівных і нелеґіслатівных кроків, котры суть повязаны з хоснованьом языків народностных меншын, може ініціовати веце важных леґіслатівных кроків, котры дотуляють ся знаків коло драг, желізніць, освіты державных робітників, як і публікованя перекладів найважнішых правных приписів в языках народностных меншын. По довгім часі наставили ся основны єднотной аплікації языковых прав народностных меншын,“ інформує уряд.

В области културы іде головно о приятя Закона о Фонді на підпору културы народностных меншын і його конштітуованя. Закон быв схваленый в році 2017 і фонд выникнув ку 1-му юлу того самого року. Першый раз были через нього фінанцованы меншыновы проєкты в році 2018. Вызначным за остатні два рокы было і выникнутя Секції розвитку містной і реґіоналной културы і културы народностных меншын в рамках Міністерства културы Словацькой републікы. Започали ся і приготовліня Стратеґії розвитку містной і реґіоналной кулутуры і културы народностных меншын Словацькой републікы до 2030-го року. Частьов той стратеґії має быти акчный план з конкретныма кроками.

В области народностного школства зробили ся так само вызначны крокы. Належыть до них наприклад зряджіня окремой Секції народностной і інклузівной освіты в рамках Міністерства школства, наукы, досліджіня і шпорту Словацькой републікы. Ку часточному рішіню довгодобых проблемів в тій области помогли і новелізації правных приписів, котры вели ку піднятю фінанчного норматіву на школяря основной школы з навчалным языком або навчаньом языка народностной меншыны, як і ку переплачаню вытрат на подорожіня школяря зо селя, в котрім жыє, до найблизшой школы з навчалным языком народностной меншыны.

Є што зліпшовати

Як інформує уряд в пресовій справі, Ласло Буковскый, уповномоченый про народностны меншыны, в документі конштатує, же і наперек великым досягнутым позітівам надалше суть великы недостаткы.

„Дотеперь  не суть в повній мірі наповнены законны обовязкы в области языковых прав у парактіці. Орґаны і інштітуції, котры мають конкретны области у своїй ґесції, означують за єдну з найважнішых причін актуалного стану недостаток фінанчных средств.“

Зато є треба подля уповномоченого приступати ку творіню розрахунків орґанів верейной справы, теріторіалной самосправы і вшыткых повинных субєктів з увагов на потребу приділити фінанчны средства на оправу існуючіх недостатків. На другім боці уповномоченый вказує на великы недостаткы при аплікованю конштітуційов ґарантованых прав меншын в компетенції высшых теріторіалных цілків (країв).

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА