Проґрам Театру Александра Духновіча в Пряшові на місяць юн 2019

Приносиме вам проґрам Театру Александра Духновіча в Пряшові на місяць юн 2019-го року.

5-го юна 2019

Ковалі (Велика сцена, 19.00 год.)

Пєса сербского автора Мілоша Ніколіча є абсурднов, місцями терьпков комедійов, котра вас заведе до ковальской ділні, десь в Німецьку. В ній ся десяткы років по войні стрічають трьоми ковалі, бывшы вояци, котры вдяка „службі отцюзнині“ проплели свої долі і свої роды. Каждый забезпечів свого потомка і наслідника свойой кузні. Но як раз тота реалность їх по роках дожене до безнадії і выжадать собі їх стрічу. Но кому властно іщі потрібны ковалі і їх кузні? Чекать на вас много запліток і розузлінь.

12-го юна 2019

Пісковиско (Мала сцена, 19.00 год.)

Коли доростаме? І што то властно дорослость є? І є властно жадана в добі гіперреаліты, коли уж не мож точно повісти, што є досправдове і што фіктівне? Коли перебераме зодповідность за властны чіны? Докажеме дати явно знати свої чувства? Тужыме іщі по тырвалых односинах? Не сьме і в дорослости все дітми і в дітинстві дорослыма? Суть ВІН і ОНА іщі досправдовы, або то вже лем знакы у віртуалнім світі? Найліпша пєса (гра) 21-го столітя про двох акторів (грачів).

Выступліня ТАД мімо Пряшів

1-го юна 2019

Обіцянкы (Културный дім Воліця, 17.00 год.)

Театер Александра Духновіча пєсов Тайовского Обіцянок має намагу надвязати на драматурґічну лінію обявного інсценованя словацькых класічных творів у русиньскім културнім контексті, в режійнім наштудованю Матуша Ольгы. Тайовскый пєсу написав у 1898-ім році і выдав єй за властны грошы, жебы в часі мадярізації дав словацькым охотникам пєсу в материньскім языку, котру бы могли зробити і в рамках скормных условій. Днесь театер посередництвом того тексту хоче публіці демонштровати театралну інсценацію як твориву роботу інсценаторів.

2-го юна 2019

Фараоны (Културный дім Ломне, 14.00 год.)

Фунґованя колхозу, в котрім панують класічны стереотіпы о діліню роботы на хлопску і женьску, нарушыть єдного рана вість і вычеряню позіцій. Там, де стояли хлопи, будуть жены і навспак. Што ся стане, кедь хлопи – функціонарі, нараз будуть женами, котры ся старають о обыстя? Комедія Фараоны приносить гуморну і выдарену моделову сітуацію на тему перевернутя сполоченьскых роль.

8-го юна 2019

Домашнє гніздо (Културный дім Шарішске Чорне, 18.00 год.)

Комедія о нас і справах, котры нас роблять тым, кым сьме: нашых родічах, нашых любвах, нашых несповненых снах і о тых, котры наповнили ся, хоць сьме ани не надіяли ся на тото, о надії – бо будьяк кліше і спрофанована є, все вмерать послідня, ці ся нам то любить, ці ніт. Комедія нелем о Русинах і Выході, а о каждім (і про каждого), хто колись мусив вернути ся домів, хто колись з дому хотів втечі, хто даколи у своїм жывоті холем на даякый час став частьов даякого домова і взяв на себе дакотру роль: родіча, дітины, сородника, мужа…

9-го юна 2019

Фараоны (Културный дім Колбівці, 14.00 год.)

15-го юна 2019

Фараоны (Културный дім Рогожник, 16.00 год.)

16-го юна 2019

Обіцянкы (Културный дім Бехерів, 15.00 год.)

19-го юна 2019

Ковалі (На дворі замку у Зволені, 21.00 год.)

23-го юна 2019

Фараоны (Културный дім Орлов, 14.00 год.)

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА