Словацька влада буде завтра засідати в русиньскім селі

Выїздове засіданя влады дня 12. новембра 2014 р. буде в селі Убля в окресі Снина, інформує Словацька інформачна і пресова аґентура (SITA).

Село приготовлює на засіданя владного кабінету просторы в културнім домі, котрый має капаціту 200 місц. Пресова конференція буде по засіданю проходити в салі вінчаня Сельского уряду, повіла про SITA старостка села Надєжда Сиркова.

Сиркова інформовала, же премєр і міністры бы мали в Ублі покоштовати традічны русиньскы делікатесы, як татарчаны пирогы з бандурками і сыром, пирогы з мясом, мачанку.

Два кілометры од села є гранічный переход на Україну одкрытый 24 годин денно. В Ублі днесь жыє коло 800 жытелів. Найвекшым проблемом русиньского села є высока безробітність і далеке потуваня за роботов. Сусіднім селом з україньского боку є Малый Березный. Подля старосткы є вкладом гранічного переходу в близкости села росшыріня обходных контактів і розвиваючій ся путьовый рух.

Жрідло: SITA (корочене)