Вышла нова книжка Михаіла Алмашія

В апрілю 2019-го року одбыла ся важна подія в жывоті Русинів Україны і цілого світа – вышла із друку книжка доктора філозофії Михаіла Алмашія – Карпаторусинський народ. Доля, пронесена крізь віки.

Тота книжка надзвычайно цінна і важна про переоцініня історії, досліджіня етноґрафії і културы Русинів Підкарпатя. Книга є написана в україньскім языку і є унікатнов збірков історічных матеріалів, архівных документів, цітатів знамых вченых – історіків, думок выдатных людей, історічных особностей, властных спомин автора, котрому в тім році выповнить ся 89 років.

Красный вік автора, многорічне глубоке штудованя темы русинства, у вшыткых смыслах того слова, дозволять йому робити серьйозну неопереджену аналізу многых історічных процесів і подій, котры дотулили ся долі підкарпатьскых Русинів. Заключіня, котры передкладають ся чітательови по познакомліню ся із книгов, часами півперечають знамым тверджіням, котры находять ся в підручниках історії. Но книга надзвычайно притігать обєктівнов і вецестороннов презентаційов матеріалів, котры автор приносить чітательови із вынятковов любвов, а часами із больов за тяжку долю своїх родаків – Русинів, за невызнаня і неприниманя факторів русиньской самоідентіфікації, в тім чіслі русиньской наукы, културы, освіты, шпорту, за недоціненость выдатных Русинів – родаків із підкарпаторусиньского краю, котры залишыли свій важный слід у світовій русиньскій дідовизні.

Автор захоплює ся достойностьов, честнотов і смілостьов свого народа. Намагать ся принести історічну правду вшыткым, котры інтересують ся минулостьов русиньского народа, молодым людям, котрых навчали історію у покривленій верзії, будучім поколіням Русинів, котры будуть пышыти ся своїм гордым, честным русиньскым родом.

На тото надіє ся і о тім мріє великый чоловік – автор многых выдань на тему русиністікы, заслуженый учітель Україны, член Націоналной ліґы композіторів Україны, колишній председа Науково-културолоґічного общества ім. Александра Духновіча, многорічный член Світовой рады Русинів – Михаіл Алмашій, автор книжкы Карпаторусинський народ. Доля, пронесена крізь віки.

Автор статі: Валентіна Кабай, Ужгород. Протлумачів: Петро Медвідь.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА