«Слово» – Третя постна неділя, крестопоклонна – неділя, 9.00 год

Третя неділя Святой штиридцютніці ся называть Недільов крестопоклоннов. На утрені ся выкладать св. Крест. Отцьове Церькви нам говорять, чом ся так діє.

Хто бере серьозно запрошіня Церькви ку посту, буде з великов запаленостьов робити так, жебы принести хосен своїй безсмертнїй душі, но поступом часу тіло такого слабне і силы ся уменшують. Жебы додати підкріпліня, св. Церьков указує на св. Крест. Но на Крест не як знак понижіня, терпіня і болести, але як на знак побіды Хріста над смертьов і діяволом. А так мы смотрячі на Крест, на тото побідне знамено Хріста, набываме новых сил до постного часу. Тот Крест нам говорить – уж не довго, і є Пасха. Крест нас пікріплять, жебы сьме на тій дорозі вытримали. Но не лем на дорозі поста, жебы хосенно пережыти а дойти ку славному дню Воскресіня, але і на дорозі нашого жывота. Крест укзує, же Пасха нашого жывота є близко. І оплатить ся остати вірныма Господу. Лем курто, барз куртенькый час, і мы перейдеме до вічной славы.

Ісус Хрістос в днешнім слові Євангелія і ку нам говорить: Хто хоче іти за мнов, най одвергне самого себе, возьме свій крест і мене наслідує. А далше додав: Хто ся буде ганьбити за мене і мої слова меджі тым грішным і чуджоложным поколіньом, за того ся буде ганьбити і Сын чоловіка, кедь прийде в славі свойого Отця зо вшыткыма ангелами. А так хоць іти за Хрістом выжадує од нас того одвергнутя старого чоловіка, його умертвліня, одшмаріня того самозбаламучіня, до котрого упав Адам з Євов, выжадує вірность не лем Хрістови, сміло голосити ся ку ньому в тім світі, котрый є в це і веце напряменый проти Хріста, але тыж сміло голосити ся ку Хрістовым словам, прияти євангеліє до свойого жывота, жыти подля нього.

Тото вшытко много раз не є легкым і выжадує много намаганя. Прото Ісус указує на крест і куртость того земного часу, жебы зробити наше духовне мозоліня легшым, жебы сьме не падали на духу. Бо йому належыть побіда. А кедь останеме Йому вірныма, і о нас будуть платити слова: Дакотры із тых, што ту стоять не зазнають смерти, покы не увидять Царьство Боже приходити в славі. Слава Ісусу Хрісту!

В неділю,  31. марца 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 31 марца 15.00 і 20.00 год. і 1 апріля о 2.00, год. за русиньскым часом.