Край інвестує до драг і розвитку турістікы в Меджілабірцях

Пряшівскый самосправный край (ПСК) хоче помочі розвитку турістічного руху в найрусиньскійшім окресі в рамках Словакії (понад 60 процент жытелів окресу). Оправить ся Музей модерного уменя Енді Варгола, купить ся турістічный влак.

І тото оголосив председа ПСК Мілан Маєрьскый почас свого выїздового засіданя в Меджілабірцях, котре проходило в середу 27-го марца 2019-го року. Інформовала о тім словацька пресаґентура SITA. Головныма темами засіданя были оправа драг, дуална освіта і споминана підпора турізму.

Кедь будуть драгы, будуть турісты і веце роботы

Як аґентуру інформовала Леа Геілова із одділіня комунікації і пропаґації Уярду ПСК, Меджілабірці суть по Старій Любовні другым окресом, котрый навщівив пряшівскый жупан Маєрьскый в рамках своїх планованых выїздів.

Головным цільом было выслухати собі представителів верейной справы, де видять найвекшы проблемы і де про зміну потенціал розвитку того окресу, котрый належыть межі найменше розвиты окресы Словакії.

Маєрьскый видить як найвекшу пріоріту реґіону якостны драгы. „Кедь будеме мати добру інфраштруктуру, привабиме до окресу веце інвесторів, але і турістів, і так даме людям роботу. Влони сьме до драг в окресі інвестовали 1,9 міліон евр, тот рік плануєме дати на тот ціль 4,4 міліона і в реконштрукції драг будеме продовжовати,“ повів жупан в Меджілабірцях.

На стрічі ся за інформаціями аґентуры бісідовало і о дуалній освіті, соціалній области, но і о різных вызвах, до котрых можуть залучіти ся села і такым способом здобыти фінанції на різны проєкты.

Розвиток турізму

„Окрес Меджілабірці є унікатный в цілій Европі тым, же ту є Музей модерного уменя Енді Варгола. Є то величезный потенціал про розвиток турізму, на котрый мусить реґіон заміряти ся,“ повів Маєрьскый, котрый припомянув, же влада Словацькой републікы дала на реконштрукцію музею 125 тісяч евр. Жупан є пересвідченый, же затрактівніня просторів музею поможе ку высшій навщівности той інштітуції.

Окрім реконштруцкії бы ся мала накупити з тых грошей і світлова техніка, мултімедіално-інтеркатівны гардверы на ожывліня експозіцій, в плані є і аплікація авдіо проводників в різных языках.

„Свіжов новотов, котров ся можеме похвалити і за котру сьме як членове Моніторуючого выбору поставили, є схваленый проєкт модернізації інфраштруктуры про мултімодалный транспорт в Коросні і Меджілабірцях,“ інформовав Маєрьскый.

Вдяка тому проєкту про Меджілабірці купить ся турістічный влак, котрый буде ходити почас літньой сезоны. Туріста, котрый ся в нім повезе, іде о влак на колечках, увидить вшыткы найвызначнішы атракції міста і околіці. Пряшівскый жупан думать, же і тота іновація буде тяглом про турістів. В рамках того проєкту зроблять ся і три новы заставкы коло головных турістічных атракцій, намонтують ся триязычны електронічны табліці з ґрафіконом. В Коросні з того проєкту змодернізує ся автобусова штація. На проєкт было приділеных 618 тісяч евр.

Школа Енді Варгола буде годна черьпати еврофонды

Маєрьскый в Меджілабірцях представив і новоту в области школства. Експерты Світовой банкы в рамках ініціатівы Catching-up выбрали Середню фахову школу політехнічну Енді Варгола в Меджілабірцях як єдну із пятьох школ в Пряшівскім самосправнім краю, котра буде годна жадати о европскы фонды.

Єднов із пропозіцій, што конкретно зліпшыти в тій школі, то вытворіня бізнісового інкубатора про малых і середніх подникателів.

„Была бы то велика принагода про абсолвентів школы, котры бы хотіли зачати подникати, но не мають фінанції на то, жебы взяли собі просторы до аренды, припадно не мають потрібне выбавліня,“ повів жупан і додав, же бы ся тым вытворив і простор дуалной освіты.

Жрідло фотоґрафії: Prešovský samosprávny kraj.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА