«Слово» – Друга постна неділя – неділя, 9.00 год.

Пережыли сьме із Божой благодати уж другый тыждень Святой штиридсятніці, того Богом дарованого часу. Євангеліє днешньой неділі вказує нам потребу великой віры і довіры ку Хрістови.

Говорить нам о сітуації, коли Ісус пришов до Капернаума. А як быв в домі і учів, посходило ся тілько народа, же не было місця ани при дверях. Тота інформація є барз важна, бо далше євангеліє нам говорить о штирьох мужах, котры несли невладного чоловіка. Несли го ку Хрістови, но не могли ся із хворым перетиснути допереду ку Ісусови, і так выходять на стріху, і спущають го прямо перед Ісуса. На тото Ісус видячі їх віру реаґує: …одпущаять ся ті гріхы. Но дакотры, фарізеї і учітелі закона, за тото одсуджовали Хріста. Но Ісус видів, што одбывать ся в їх душах і прото їм говорить: Чом так плано роздумуєте у своїх сердцях. Так видів віру і тых людей не лем в самім домі, кедь спущали того невладного, але уж кедь із ним выходили, жебы через місто принести ку Ньому. Ісус видів уж і початок їх віры. Коли они в сердці рішыли прийти ку Хрістови. Они увірили, же Ісус тото може зробити. Не дали ся одбити ниякыма тяжкостями і перешкоджінями, што їх бы могли сперти. Ани повно людей їх не заставило. Выходять на стріху. Кілько намаганя то выжадовало од тых людей, но їм помагала силна віра, же Хрістос му поможе.

І мы зазнаваме різны тяжкости і перешкоджіня. Ці то нашептованя злого або жебы не аж так строго постити, жебы не аж так вельо ся молити, же мы ся і так не зміниме. Ту нам треба зареаґовати так, як тоты люде. Не дати ся одбити ниякыма фалшывыма і облесныма думками злого ці словами людей коло нас. Но твердо вірити, же нияка барьєра нас не може затримати. Бо віра в Хріста є силніша як вшыткы тяжкости. Віра, же і мы учуєме од нього тоты слова потіхы: Одпущають ся ті твої гріхы.

Прото і тоты слова най нас посилнють до далшого тыждня Святого посту, жебы не ослабити наш постный подвиг. А коли зістанеме тверды, не одбитны, коли сі усвідомляме, же сьме на очах Того, котрый видить не лем нашы вонкашні діла, но і внутрішні, втогды і наша віра буде завіншана, так як віра тых людей, што несли невладного. Слава Ісусу Хрісту!

В неділю,  24. марца 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 24 марца 15.00 і 20.00 год. і 25 марца о 2.00, год. за русиньскым часом.