Вышол додрук «Лемковины по обох странах Карпат»

26. лютого/фебурара 2019 р. на выдавничным рынку явило ся другє выданя «Лемковины по обох странах Карпат» – єдной з трьох книжок Станіслава Криціньского, творячых трилоґію оповіданя о Лемках і Лемковині. Книжка одднес є доступна до придбаня.

Другє выданя такой не ріжнит ся од першого. Як нашій редакциі повіл автор, о додруку «Лемковины по обох странах Карпат» рішыло выдавництво Лібра. Причынком ґу тому был скінченый тираж, а при тым намаганя дальшых охочых придбати публикацию. Поправил єм лем деякы хыбы і опискы – додає Криціньскій.

«Лемковина по обох странах Карпах» то перша з трьох книжок С. Криціньского, якы мож зачыслити до «лемківской трилоґіі» того автора. Є то проба представліня істориі той части Европы – предовшыткым Лемковины, але і часом в однесіню до цілой Карпатской Руси, од періоду єй заселіня по половину ХІХ ст. Книжка єст історично-культуровом вандрівком, вчас котрой чытати мож о початках осадництва в Карпатах, вандруючых статуях Божой Матери, бескідскых збійниках, але і о барскій конфедерациі, яка славлена Поляками, доцяп інакше явила ся Лемкам і є неґативно постерігана. Вельо місця в книжці посвячено змагяням медже присутным од початку локациі сел – православійом і грекокатолицизмом – введеным постановами берестийской уніі з 1596 рока. Обшырні описано лемківскы іконы і церкви, якы як першы асоциюют ся з Лемковином – головно тым, якы зачынают своі вандрівкы лемківскыма путями.

Книжка, як спомятнуто во вступі, є такой початком оповісти о Лемковині С. Криціньского. Выдавництво Лібра реклямує всітри книжкы як компедию знаня про Лемковину. Фактично, мож за такы брати опрацуваня С. Криціньского, якы являют ся основным джерелом інформаций для познаючых історию, культуру і прикметы достоменности Лемків. Кінцьом 2017 р. явила ся друга част оповіданя, будуча при тым продолжыньом опису істориі – «Лемковина. Час войны і миру». В ній же автор зачынат вандрівку од 30. років ХІХ ст. по 1939 рік. Криціньскій представлят народины народового руху серед Русинів Лемковины, початкы лемківской літературы, подіі Великой Войны і репресиі, што впали на Лемків, інтеліґенция яка была поневолена в Талергофі. Дальшы розділы книжкы то опис воєнных цмонтерів, якы сут густо розсіяны по Лемковині, справа конверсий до православя, покликаня Апостольской Адміністрациі Лемковины, жытя на лемківскым селі та ремесло.

Послідня з троіх є печатана в квітни/апріли влонишнього рока «Лемковина невтрачена», яка не лем розвиват дальшу історию земель, але тіж вказує на теперішній лемківскій світ.  Книжка веде через воєнный період, споминат на дукляньско-пряшівску операцию, пак траґічны подіі з 1945-47 рр. Дальше можеме прочытати о часах комуністичного поневоліня, інвіґіляций, доносів та неможности основати незалежну од чужых сил лемківску соспільну орґанізацию.

Другє выданя «Лемковины по обох странах Карпат» можете придбати за слідуючым мотузком.