Мож приголосити ся до Карпатьской писанкы 2019

Вігорлатьскый музей в Гуменнім як головный орґанізатор події у співпраці із Унійов жен Словакії – крайсков орґанізаційов у Пряшові, запрошують до актівной участи на XXVII. річнику меджінародной конкурзной выставкы під назвов Карпатьска писанка 2019 (Karpatská kraslica).

Як за Вігорлатьскый музей інформовала Яна Федічова, почас 26-ох річників той події вже было выставленых коло 22 тісяч писанок од майже 500 авторів.

Писанкы зо Словакії і сусідніх держав

Вігорлатьскый музей дотеперь в рамках выставок одпрезентовав творы од авторів із вшыткых реґіонів Словакії, Чеськой републікы, Україны, Польщі, Мадярьска і Румунії.

26 річників, як інформовала Федічова, навщівило понад 50 тісяч людей. Намагов музею в Гуменнім є і через тоту подію всокотити і презентовати богату духовну традіцію карпатьского реґіону і вытворити простор ку презентації, взаємному черяню скушеностей і творити так співпрацу авторів писанок із цілой Словакії і далшых держав у карпатьскім реґіоні. Карпатьска писанка ся так стала новым сімболом черезгранічных контактів і приятельства народів і народностей, котры жыють в карпатьскім реґіоні, інформує музей.

Приголосити ся може каждый

Із своїма писанками ся може приголосити каждый, нелем зо Словакії, без різніці віку і хоснованой технікы, котров красить писанккы. Конкурзны колекції авторів ся приймають на адресі Вігорлатьского музею в Гуменнім (Vihorlatské múzem v Humennom, Námestie slobody 1, 066 01 Humenné) до 15-го марца 2019-го року. Детайлны условії про участь в конкурзі мож найти на офіціалнім сайті музею.

Тогорічна выставка писанок буде доступна про навщівників в просторах музею од 23-го марца до 30-го апріля 2019-го року.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА