Творы 40 артистів під єдным дахом – выстава «Michael Jackson: On the Wall»

Выстава, котра не лем бавит, але і вчыт. Выстава, котру виділи соткы. Выстава, яка пошырює творы, на якы нормально звертают увагу лем некотры специялисты. Бесіда о выставі пн. «Michael Jackson: On the Wall», яка одкрыта буде в парижскым Grand Palais іщы лем 3 дни, значыт до 14. лютого/фебруара 2019 р.

Выстава задумана єст в тот спосів, жебы, хоснуючы залюбліня до короля попу, любителі Майкеля Джексона познавали через ню важных сучасных артистів. Презентуваны сут творы вельох артистів, котры інспірували ся Майкелом Джексоном, тіж тых найвыдатнійшых персон світа штукы. А серед тых остатніх находит ся і Енді Варголь.

В 1982 р. Енді Варголь створил портрет Джексона, а за ним пішло вельох артистів, репрезентуючых ріжны поколіня і походячых з ріжных держав. Выстава презентує за хронолоґічным порядком мультімедияльны експонаты, котры дозваляют піти в подорож ріжныма декадами в попкультурі. Але предовшыткым выстава оповідат о тым, як вродженый в малій місцевости, в Індияні, музик, композитор, танцюриста, актор, інспірувал репрезентуючых розмаіты обшыри творців. Влияня, якє Джексон мал на другых, м.ін. зо світа моды ци музиків, было уж доцінене. Тепер звернено увагу на тото, як інспірувал ґрафіків, малярів, різбярів ци мультімедияльных артистів.

Кураторы National Portrait Gallery i Grand Palais зобрали під єдным дахом творы 40 артистів – вельо з них походит з приватных колекций. Выстава збогачена є музиком короля попу, в декотрых салях вказуваны сут його культовы відеокліпы, а в ґаблотах презентуване найбарже знане облечыня. Додатково видіти мож материялы аналізуючы найпопулярнійшы хореоґрафіі М. Джексона.

Выстава тішыт ся великым заінтересуваньом, а створеный климат додатково спричынят, же любителі Майкеля Джексона познают і реєструют в памяти творы артистів. Мож повісти, же завдякы тому выстава має і кус едукацийный характер.

Пак выстава іде до Бонн, де одкрыта буде од 22. марця до 14. липця/юлія 2019 р.

плякат выставы «Michael Jackson: On the Wall» зо страны www.vogue.pl

фот. портрет Майкеля Джексона на гадвабі авторства Енді Варголя, джерело: www.newsweek.pl