«Слово» – 36-та неділя по Сошествії Святого Духа – неділя, 9.00 год.

Ісус Хрістос приходить до Єріхона, де при дорозі сидить сліпый чоловік і просить милостыні. Як чув, же множество людей переходить коло нього, звідує ся: Што то ся діє?

А коли йому одповідають, же то Ісус Назарян переходить, він кричіть: Ісусе, Сыну Давіда, помилуй мене. Тоты, што ішли впереді, його заставлюють, жебы быв тихо, но він кричіть іщі голосніше. Ісус ся заставив і дав собі го закликати. Звідує ся го, што од нього хоче. Не зато, жебы не знав, але жебы вказати велику віру того чоловіка. І про його велику віру давать му то, што просить: Най ся мі одкрыють мої очі. І такой провидів і наслідовав го по дорозі.

Тото слово вказує нам, же і мы маме так приступати ку Хрістови. Кричати із глубины душы. Не нашыма устами, але выдавати зо себе тот крик віры, і щірой любви, котрый дре ся із нашого внутра. Котрый не дасть ся одрадити ниякыма противниками, котры нас заставлюють, жебы быти тихо. Котры то суть? Діявол, нашы страсти і вонкашній світ.

Прото і мы так як тот сліпый кричме із глубыны душы, із жывов віров, неберучі огляд на тых противників нашого спасіня, котры не хотять, жебы сьме пришли ку Хрістови. Жебы сьме і мы учули Хрістовы слова: Твоя віра тя сохранила, ідь в покою. Слава Ісусу Хрісту!

В неділю,  3. фебруара 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 3. фебруара 15.00 і 20.00 год. і 4. фебруара о 2.00, год. за русиньскым часом.

фото: Кодекс Еґберта: Выздоровліня сліпого мужа із Єріхона. Жрідло Wikipedia.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА