«Розсыпала ся дуга» – концерт в памят Уршулі Яніцкой-Кшывды

В пятницю, 25. січня/януара 2019 р., в селі Завоя пройде концерт присвяченый Уршули Яніцкій-Кшывді в річницю смерти. В проґрамі м.ін. зложыня квітя на гробі вызначной етноґрафкы, Служба Божа в костелі св. Климента і концерт пн. «Розсыпала ся дуга» в Бабіогірскым Культурным Центрі. Початок подіі о год. 16.40.

Уршуля Яніцка-Кшывда была етноґрафком, яка присвятила свою дослідничу та музеальну роботу Бескідам. В єй доробку найдеме і труды тыкаючы Спиша ци бескідників, т.є. карпатскых збійників. В 1991 р. в Етноґрафічным Музею в Кракові орґанізувала моноґрафічну выставу присвячену Лемкам з богатого збіркового фонду того музею.

Село Завоя, котре находит ся в Західнім Бескіді (Маковскым і Жывєцкым), єст найдолшым селом в Польщы, має 18 км долгости. Уршуля Яніцка-Кшывда ціле жытя была звязана як раз тым з селом.