Полазник з Телича – 70 процент – субота, 20.00 год.

Мария з Телича, што коло Крениці, має себе за щестливого чловека. Якы нещестя, якы поневіряня припали на єй долю – а єднак Бог вюл так, же вшелеяка біда єй обходила. Чом? Но бо ся вродила на саму такой Велию!

Сельска жена, яка помагала в Теличу вшыткым женам, котры родили діти, не встигла повечеряти, як єй покликали до Віхты Варґовой. Легко вшытко пішло і скоро телицка акушерка радістно підняла догоры новонароджене дівча: «Тото дітя буде щестливе в Бога! Народило ся на саму Велию – товды, коли і Ісусик!».

Велия, Різдво – то гейбы тіж і приватне, особисте свято Мариі Варґы (по мужу – Мария Тарасєвич), яка днеска мешкат в Мариямполи близко Галича. Зато знат про різдвяны традициі в Теличу праві вшытко. Для ня, напримір, несподіванком было, якій полазник пекли в Теличу. Може і для вас найдут ся несподіванкы? То прошу слухати…