Меншыны засіли до спільного велийного стола

В неділю, 16. грудня/децембра 2018 р., в просторах Рыцарской Академіі в Ліґници проходила ХVII Велия Народів. То святочна стріча орґанізувана рік-по-рік Стоваришыньом Жены Европы та другыма орґанізациями, при котрых зберают ся нацийональны та етнічны меншыны, якы прожывают на териториі міста. Подію підтримує Уряд Міста Ліґниця.

За недільным велийным столом сіли попри собі представникы нацийональных і етнічных меншын, якы прожывают на обшыри міста. Своі святочны звыкы представляли Японці, Американці, Пакістанці, Ніґeрийці, Французы, Німці, Ормяне, Украінці, Жыды, Циґане, Полякы (ґаздове стрічы) та очывидно Лемкы.

Лемківску етнічну меншыну репрезентували м.ін. члены Стоваришыня Лемків. Наперед стрічы голос мал президент Ліґниці, Тадеуш Кжаковскій, якій привитaл згромадженых з тогорічным ближучым ся Різдвом, якє в каждій культурі єст в інчий, рівно цінний і богатий спосіб святкуване. Окрем ґазды міста пристуны были і заступці президента Ліґниці, Ядвіґа Зєнкєвіч і Кжыштоф Душкєвіч.

Пак кажда з меншын вказувала на своі традициі, звыкы і велийны стравы. Меншыны мали можніст представити свою штоденну діяльніст, яка направлена єст на плеканя рідной культуры.

фот. Президент Тадеуш Кжаковскій / Фейсбук