Ужгородьска духовна академія святкує 240 років

13-го децембра 2018-го року одбуде ся в Ужгороді торежственный проґрам, котрым собі Мукачівска ґрекокатолицька єпархія припомяне 240-ту річніцю перенесеня духовной семінарії до Ужгорода.

Проґрам зачне на полідне Архієрейсков божественнов літурґійов у старій семінарьской каплічці в Ужгородьскім замку, котру буде служыти мукачівскый єпарха преосвященый владыка Мілан (Шашік). Торжество буде продовжовати конференційов, по котрій буде одслужена панахіда за вшыткых колишніх настоятелів, выхованців, основателів, добродителів і фундаторів духовной семінарії.

Заснована іщі в Мукачові

Днешня Ужгородьска ґрекокатолицька духовна академія імени блаженого Теодора Ромжы має свій початок іщі в Мукачові за часів єпіскопа Мануїла Ольшавского. Тот там у 1744-ім році засновав богословску школу.

Од 1778-го року школа зачала продовжовати свою діялности в Ужгородьскім замку, котрый подаровала мукачівскому єпіскопови Андрійови Бачіньскому імператорка Марія Терезія. Школа была владыком Бачіньскым перетворена на духовну семінарію із штирирічным штудіом і дістала назву Трьох святителів. У 1941-ім році дістала семінарія статус академії.

У 1949-ім році была ліквідована Мукачівска ґрекокатолицька єпархія комуністічныма властями, тым перервало ся і існованя школы. Ілеґално в роках 1956 аж 1991 закінчіло богословя 53 священиків.

Реліґійна свобода, яка пришла у 1989-ім році, дала можливости обновити і діялность академії, котра в тім часі почала діяти в Мукачови під веджіньом ректора – владыкы Йосифа (Головача). Єпархія в тім часі глядала можливости збудованя новой академії, кедьже замок, де перед совітьскыма влястями мала академія свій притулок, зістав у властницьтві державы.

У 1992-ім році єпархія здобыла фундуш на будованя при вступі до села Минай, коло Ужгорода. Академічный рік 1992 аж 1993 богословы вже штудовали в Ужгороді, хоць будова академії іщі не стояла.

У 2004-ім році почас першого святкоаня празднику Перенесеня мощей блаженого священомученика Теодора (Ромжы) кардінал Йозеф Томко із Рима посвятив докінчену будову новой семінарії і фундамент під його нову семінарьску церьков. У 2007 році владыка Мілан, мукачівскый єпарха, вєдно із кардіналом Теодором Еґаром Мак-Керріком, вашінґтоньскым архієпіскопом – емерітом, посвятив нову церьков коло богословской академії.

Штудовав в ній і Духновіч

Школа, котру про богословів засновав у Мукачові Ольшавскый і пізніше продовжовала свою діялность в Ужгороді, была єдинов на теріторії втогдышньой великой Мукачівской ґрекокатолицькой єпархії.

Хоць у 1818-ім році была заснована Пряшівска ґрекокатолицька єпархія, тота іщі довгый час не мала властну духовну семінарію. У Пряшові семінарію засновав аж владыка Николай Товт і была одкрыта 12-го септембра 1880-ім році. Такым способом іщі довгый час по одокремліню Пряшова од Мукачова богословы із Пряшівской Руси ходили штудовати як раз до Ужгорода. Меджі нима і многы вызначны особности русиньской історії. З тых особностей не мож выхабити і двох будителів, котры выходили ужгородьску семінарію. Были нима Александер Духновіч і Александер Павловіч.