10. річниця смерти владыкы Йоана Семедія

В найблизший четвер, 6. грудня/децембра 2018 р., мукачівска грекокатолицка єпархія припоминала буде 10. річницю смерти єпископа Йоана Семедія, якій через більше як два десятлітя завідувал том русиньском підкарпатском єпархійом.

Заупокійна літургія служена буде о год. 17.30 в Хрестовозвдиженьскым кафедральным соборі в Ужгороді. Богослужыня очелювал буде теперішній правлячий мукачівскій єпарх, владыка Мілян Шашiк.

Паралельно до богослужынь в Ужгороді, помічний владыка мукачівской єпархіі, єпископ Ніль Лущак зачне о 17.00 год. панихіду на цмонтері в Малій Копани, то є рідным селі владыкы Семедія. Пак правлена буде архієрейска літургія в місцевым храмі св. Василия Великого.

Владыка мукачівской єпархіі

Йоан Семедій народил ся 26. червця/юнія 1921 р. в селі Мала Копаня виноградівского району, на Підкарпатскій Руси, котра товды была частю Чехословациі. В 1942 р. завершыл хустску ґімназію. Внет поступил до Ужгородской Богословской Академіі. Осіню 1944 р. стал добровольцьом Чехословацкой Вызвольной Арміі. Пак был демобілізуваний, жебы мочы продолжати науку в Богословскій Академіі, яку конечно завершыл в 1947 р.

6. липця/юлия 1947 р. был высвячений на грекокатолицкого священника товдышнім мукачівскым єпископом Теодором Ромжом (пізнійшым блаженным католицкой Церкви). Пак признаий был за префекта і выкладача в Ужгородскій Богословскій Академіі.

Од лютого/фебруара 1949 р., коли была комуністами офіцияльно зліквідувана і гноблена мукачівска єпархія, аж до 1987 р. робил в цивільных роботах. Цілий тот час Йоан Семедій діял в рамках підземной грекокатолицкой Церкви на Підкарпатскій Руси.

24. серпня/авґуста 1978 р. был хіротонізуваний на єпископа з рук владыкы Александра Хіры. Піл рока пізнійше, в 1979 р. призначений был за єпархіяльного єпископа ілеґальной русиньской мукачівской грекокатолицкой єпархіі. Аж 21. січня/януара 1991 р. по впаді комуністичного режіму, отримал од папы римского Йоана Павла ІІ потверджыня, же є Римом признаний як єпархіяльний мукачівскій єпископ.

За рокы ведіня мукачівском єпархійом, владыка причынил ся до обновліня єпархіяльных структур, так само стоял на русиньскых позициях і не годил ся підпорядкувати русиньску Церкву sui iuris під УГКЦ.

На пенсию пішол осіню 2002 р. Помер 6. грудня/децембра 2008 р. Більше з біоґрафіі чытайте за мотузком.