Евро(етно)бізнесовий квіз

Під-редакция, як і інчы під-орґанізациі і під-ґрупы, рішыла вкінци быти важна. Так тіж придбала своіх аґентів-інформаторів. Аґенты антибруксельскы заграли так, што і Лемкы іщы важнійшы станут. Чысто несвідомо. А кєд так правильна одповід явит ся на хосен Лемків, товды наше під-радийо іщы веце евро достане.

Треба знати, де ся обернути. Мы ся тішыме, што сме в Евросоюзі. Хоц слово «союз» не про вшыткых нашых люди добрі звучыт, так тот західній союз про нас хосенний. Лем гірше, коли нашы важны і важнійшы час-до-часу прилучают ся до союзів, якы веце выбору (як в квізі) уж не дают. Товды остає нам быти вірныма найліпше самым собі і не дати ломити хырбета.

Кєд уж ґу союзу підеме – так знайме, што повороту не буде. Але о чым ту писати. Мы сме горды з союзів Лемків/Русинів. Мудрий союз знає, што Лемкы свій язык мают, культуру і окрему історию памятают. Так кєд сме Европейці, будме рады, же нас приняли.

Квіз простий. Лоббисты знают, на кого ставляти. Мы си лем скромно думаме, што і вы правильну одповід оберете. Товды наша під-редакция Фафринді вкінци перший раз достане грошы зо союзного заходу (!). А евро курс тримат – так пожыєме. Неолоґізм «Евро(етно)бізнес» по роках фікциі стане конче реальным.