Новосільскій на плятформі Google Arts & Culture

Нацийональний Музей в Кракові, будучий найстаршом і найбільшом ґалерийом штукы в Польщы, в послідніх днях долучыл до світовой плятформы Google Arts & Culture, яка при схоснуваню найліпшых технолоґій сфотоґрафувала 70 прац з музейной колекциі. Зроблено знимкы і роботам з 27 інчых польскых інституций культуры.

Нова выстава Google презентувана є в памят столітя польского артистичного кумшту, сходячого ся з річницьом одзысканя Польщом незалежности. Дає она можніст познати артистів посліднього столітя, якы влинули на вид польской культуры. Памяткы з колекциі м.ін. краківского музею презентуваны на модерній плятфорні то не лем образы. Входячы на Google Arts & Culture, мож окрем малярів познати і выдатных польскых музыків, фотоґрафіків ци коментаторів.

Плятформа, яка доступна є на цілий світ, одтепер дає можніст видіти твір Юрия Новосільского, найвыдатнійшого лемківского артисты і філософа послідніх декад. То образ з 1965 р. пн. «Пейзаж з візийом сонця», якій походит як раз з колекциі Нацийонального Музею в Кракові.

Плятформа дає можніст зазрити і до творчости інчых выдатных польскых артистів. Видіти мож творы ґенія не лем малярства, але тіж драмы, архітектуры ци поезиі, Станіслава Выспяньского. Представляна є тіж творчіст режысера театру, Тадеуша Кантора, ци жыючого світовой клясы композитора Кжыштофа Пендерецкого.

Завдякы нановійшій технолоґіі образ знятий фотоапаратом Google творений є в ґіґапіксельовых розмірах, што перекладат ся на прецизийне зобразуваня творів. При помочы зроботизуваного апарату Art Camera достеречы мож деталі, якых на перший позір не видно.

фот. прінтскрін / www.artsandculture.google.com