Людмила Шандалова одпрезентує нову книжку

Як інформовало обчаньске здружіня tota agentura, дня 23-го новембра 2018-го року одбуде ся святочне воведжіня до жывота новой книжкы про дітей од Людмилы Шандаловой під назвов Ани бы сьте не вірили.

Нова Шандаловой книжка, котра вже традічно з їй пера выходить в дзеркаловім русиньскім выданю – кіріліцьов і латиніков, вышла з фінанчнов підпоров Фонду на підпору културы народностных меншын. Торжественна презентація зачне в споминаный день о 16.00 год. в просторах концертной салы Основной умелецькой школы у Свіднику.

Носителька літературных премій

Людмила Шандалова є писательков і културнов діятельков серед Русинів Словакії, котра жыє у Свіднику. Дебутовала збірков стишків про дітей під назвов Подьте, дїти, што вам повім, котра вышла у 2013-ім році. В році 2015 за свій дебут была нагороджена Премійов Александра Духновіча за русиньску літературу.

У 2016-ім році выдала книжку оповідань із періоду Другой світовой войны під назвов Червеный берег. Ани тота книжка не обышла ся без нагороды. У році 2018 за ню Шандаловій Літературный фонд (Literárny fond) уділив Ціну Александра Павловіча, яка ся уділює раз за два рокы за творы написаны по русиньскы. Шандаловой книжка была выбрана як найліпшый по русиньскы написаный твор на Словакії, котрый вышов у роках 2016 і 2017.

Окрім того може Шандаловой творчость знати і театрална публіка. Написала вже дакілько сценарів про дітячі театралны пєсы, котры ся звыкнуть премєровати почас Русиньского фестівалу у Свіднику. Єдна з їй дітячіх пєс уж была наштудована і серед войводиньскых Русинів.

Жрідло фотоґрафії: tota agentura.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА