Выборы до русиньского совіту выграли „Русины довєдна“

В неділю 4-го новембра 2018-го року проходили в Сербії выборы до Націоналных совітів окремых народностных меншын, котры в державі жыють. Склад свого 19-го членного совіту на слідуючій функчный період выберали і Русины.

Днесь, 6-го новембра, были публікованы резултаты выборів. Хоць вже в неділю вечур появили ся інформації о тім, котры кандідачны спискы, з котрых могли Русины выберати, здобыли проценты у окремых пунктах голосованя, ку цілковым резултатам браковали чісла із Нового Саду.

Найвеце мандатів Русины довєдна

До Націоналного совіту Русинів кандідовало сім кандідачных списків. Із того шість здобыло мандаты на слідуючій період. Як інформовала аґентура Рутенпрес на основі матеріалу, котрый публіковала Републікова выборча комісія, на русиньскы выборы пришло голосовати 47,82 із приголошеных воличів.

За резултатами, котры были публікованы, єднозначным переможцьом став кандідачный список Русины довєдна (оріґ. Руснаци вєдно), котрый із 38,44 процентами голосів здобыв вісем мандатів у новім складі совіту. Кандідачный список За Русинів – Желько Ковач (оріґ. За Руснацох – Желько Ковач), котрому дало голосы 16,44 процента голосуючіх, буде мати три мандаты. Третьов є кандідатка Быти і зістати Русином – Олена Папуґа (оріґ. Буц и остац Руснак – Олена Папуґа). Папуґовой кандідатка здобылиа 15,89 процента і в совіті буде мати так само три мандаты.

По два мандаты будуть мати в совіті дві кандідачны спискы. Першым є Список свободных кандідатів (оріґ. Лїстина шлебодних кандидатох), якому дало голосы 9,82 процент людей. Другым є Русиньска будучность (оріґ. Руска будучносц), котрый здобыв 8,93 процент голосів.

Список Молоды мають перевенство (оріґ. Млади маю першенство), котрый ословив 5,61 голосуючіх, здобуде в новім совіті єден мандат. Без мандату зістав список І мы Русинкы/Русины (оріґ. И ми Рускинї/Руснаци), за котрый голосовало лем 3,54 процента воличів.

Резултаты іщі все не суть офіціалны. Выходять із порахованя 98,82 процент голосів. Потверджены мають быти у четверь 8-го новембра до 20.00 год., но великы зміны уж не мож чекати.

В Руськім Керестурі голосовали за Ковача

В найвекшім русиньскім селі у Войводині – Руськім Керестурі список Русины довєдна за резултатами із неділі скінчів аж другый. Найвеце голосів Керестурці дали кандідачному списку За Русинів – Желько Ковач, третя скінчіла зо своїм списком Олена Папуґа. В Руськім Крестурі пришло на выборы понад 47 процент із приголошеных воличів.

Ани в Коцурі не переміг цілковый вітяз выборів. В селі, де голосовало 46 процент воличів, на першім місці скінчів список Русиньска будучность, цілковый вітяз быв аж на третім місці, передбігли го свободны кандідаты. Єднакы резултаты вказовали ся в недільняйшых інформаціях і у Вербасі, де тоты три кандідаткы обгаїли єднакы місця. У Вербасі голосовало нецілых 46 процент людей.

Цілковый вітяз потім зберав первенства наприклад у Дюрдьові, де пришло ку выборам 86,27 процента людей, в Бікічу, де пришло голосовати аж 95,5 процента воличів. Перемогу „єднотна“ кандідатка приписала собі і в Шіді. Олена Папуґа із своїм списком выграла лем в новім Орахові, де цілковый переможця не дістав ся ани першы три позіції. Другы скінчіли в Новім Орахові кандідаты Желька Ковача, треті были молоды. Новый Сад належав „єднотным“, друга скінчіла Папуґа, треті были Ковачовці.

Папуґа коментовала выборы

Уж в понедільок 5-го новембра депутатка сербского парламенту Олена Папуґа, котра вела і свій кандідачный список до Націоналного совіту Русинів, зорґанізовала у парлемнті в Белеграді пресконференцію, де коментовала выборы.

Олена Папуґа інформовала, же были при выборах недостаткы. Тоты дотуляли ся нелем выборів русиньскых, але і далшых народностных меншын. Спомянула, же спискам не были розділены средства на презентацію своїх проґрамів, ці забезпечіня позорователів коло выборів.

Так само підкреслила і слабу презентацію выборів у медіалных сервісах. Проблемом подля депутаткы было і не дотримованя права на урядне хоснованя языка русиньской народностной меншыны, бо в Кулі нихто не протлумачів на русиньскый язык оголошіня о выборах, хоць ся в Кулі русиньскый язык урядово хоснує. Цілково оцінила выборы як недемократічны.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА