В Явірках памятают о бывшых жытелях

В остатніх днях на сельскым цмонтери в Явірках на Шляхтівскій Руси одкрытий был пропамятний камін присвячений бывшым жытелям того села. Памятник поставлений был з ініциятивы Стоваришыня на Річ Промоциі і Розвитку Явірок.

Пропамятний камін поставлений был на сельскым цмонтери, якій находит ся при грекокатолицкій церкви св. Йоана Крестителя. Як інформувал председа стоваришыня на портали Фейсбук, од тепер є то місце, де мож запалити світило в памят предків. Додал, што вшыткым предкам ся сесе належало.

Памятник присвячений є вшыткым, якы народили ся в Явірках, а померли далеко од рідной землі. Інскрипция вказує, што камін в великій мірі тыкат ся і Русинів – бывшых жытелів штырьох сел при польскым курорті Щавниця – Явірок, Шляхтовой, Білой Воды і Чорной Воды.

До 40. років ХХ ст. в реченых штырьох селах прожывало бл. 2 тис. Русинів. Більшіст з них під насильстом пропаґанды переселила ся на Совітску Украіну. Пак вельо з них втекло назад. Але і іх стрітила доля вшыткым Лемкам спільна. В 1947 р. войско погнало тых люди на высокы, недоступны, обырвисты горы, в Долину Попраду, на Обідзу, аж до Санча, одкале мали на все піти в незнане.

Днешні жытелі Явірок не лем реченым памятником споминают на тых бывшых. В центрі села поставлены сут інформацийны таблиці, а на єдній з них мож чытати пару речынь про Лемків. До той поры орґанізуваных было в липци/юлию пару едиций Пєніньского Фестівалю Гірскых Культур Лемків, Руснаків і Ґуралів в Явірках. Через сусідню Шляхтову веде головний пут, якій носит назву ул. Лемківска.