В Мікулашовій посвятили памятник І. світовой войны

В суботу 20-го октобра на верьшку Каштелик коло села Мікулашова (стара русиньска назва села была Никлова) торжественно посвятили памятник, котрый припоминать бої І. світовой войны.

Як інформовав словацьку державну пресову аґентуру TASR председа Клубу воєньской історії Бескіды Мартін Дробняк, на торжестві брало участь коло 60 людей. Памятник, котрый посвятив ґрекокатолицькый і православный воєньскых духовный, творить камянный моноліт – пункт стрічі вояків, і 39 деревяных стовпів. Стовпы мають вытворити в навщівникови почутя тиску, стиснутя, котре пережывали вояци. Суть зроблены з двох матеріалів, што сімболізує дві воюючі армії.

Як выразив ся клуб на своїм профілі на сіті Facebook, в прекрасній сценерії карпатьскых гір звертають памятником увагу на то, же перед сто роками быв  тот край засягнутый тяжкыма боами.

Гора смерти

Верьх Каштелик представльовав важный оборонный пункт австро-угорьской армії. У фебруарі і марці 1915-го року проходили о тот пункт кырвавы бої, котры выжадали собі тісячі жывотів вояків. Бої были, як інформує клуб, такы страшны, же верьшок дістав меджі людми назву Гора смерти.

„Люди, котры глубше занимали ся подіями І. світовой войны, знали о значіню того місця, но звычайны турісты ту не ходили. І зато сьме ку памятнику збудовали научну стежку, котра має коло трьох кілометрів і траса дасть ся перейти за прибизно дві аж три годины,“ повів про аґнетуру Дробняк, і єдночасно припомянув, же в рамках той стежкы зробили ся і інформачны панелы.

В Мікулашовій суть уж довше

Клуб воєньской історії Бескіды діє в Мікулашовій уж довше. В роках 2014 аж 2017 там клуб обновльовав воєньскый цінтерь.

Будованя памятника зачало в юні 2017-го року, найкомплікованішый быв транспорт матеріалу на місце бывшого битевного поля. Реалізація памятника была подля Дробняка можлива вдяка підпорі з проєкту Networld, котрый перепаять дідовизну І. світовой войны в дунайскім реґіону. Памятник і стежку підпорили і села Нижня Полянка а Мікулашова. Фінанції дала і австрійска орґанізація Чорный крест.

Клуб воєньской історії Бескіды із нагоды посвячіня памятника написав, же і тот памятник має припоминати людям, котры підуть коло нього, же покійный жывот в мірі не є штось, же існує природно.

Жрідло фотоґрафії: Klub vojenskej histŕie Beskydy.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА