Йосиф Бобалик нагородженый

Як інорфмовала словацька пресова аґентура SITA, штирьох лавреатів буде мати в тім році Премія Пряшівского самосправного краю. Двоми з них будуть нагороджены in memoriam.

Іn memoriam будуть крайом нагороджены двоми гасічі Радослав Лацко і Петер Тодьор. Пряшівскый самосправный край далше нагородить свойов премійов Петра Липу – словацького джезового музиканта, котрый народив ся у Пряшові і політічного арештанта, русиньского оптанта Йосиф Бобалика.

Комісія выберала із помеджі 31 пропозіцій, о менах вырішыло ся в понедільок 22-го октобра 2018-го року.

Йосиф Бобалик

Днесь 90-річный Йосиф Бобалик народив ся у русиньскім селі Луків, бардейовского окресу. Його родина была єднов із 59-ох родин того села, котры під впливом лжывой пропаґанды і великой аґітації выселила ся до Совітьского союзу в рамках такзваных „оптацій“, де їх аґітаторы вербовали на уроджайну землю і богатство. Рішіня русиньскых оптатів одыйти было свободне, но зроблене на основі лжи.

Бобалика почась єдной танечной забавы в совітьскій Україні озброєный банедровець примусив прочітати протисталіньску аґітку, о пару місяців го затримали і быв одсуженый на десять років арешту в робочіх лаґрах. В тяжкых кліматічных, природных і людьскых условіях робив аж до року 1955. У 1967-ім році ся з родинов вернув до Чехословакії.

В році 2010 мав о Йосифови Бобаликови премєру філм під назвов Йосиф і його братя (Jozef a jeho bratia), котрый зробило Здружіня інтеліґенції Русинів Словеньска в спрівпраці із Інштітутом памяти народа. Так само выникла о Йосифови Бобаликови і книга мемоарів під назвов Сім років на севері (Sedem rokov na severe).

Нагороду про Йосифа Бобалика запропоновала Анна Главачова, котра была режісерков споминаного філму. Комісія му єй признала за незломну волю і одвагу при просаджованю моралных вартостей і свободы прояву.

Святочне передаваня нагород одбуде ся 18-го децембра в Театрі Йонаша Заборьского в Пряшові.

Іншы нагороджены Русины

Нагороды Пряшівского самосправного краю і председы Пряшівского самосправного краю ся уділюють од року 2004. За тот час было уж оціненых і дакілько Русинів. Нагороджены Русины дотеперь были Його блаженость Николай, православный архієпіскоп, співачкы Марія Мачошкова, Анна Сервіцька, Моніка Канрачова, малярі Юрій Кресила, Андрій Смолак і доктор ортопед Ян Кльоць.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА