Одбуде ся конференція Русины і Чехословакія

Русины на Словакії в рамках Округлого стола Русинів Словеньска вырішыли тот рік святковати як Юбілейный рік, 100 років Чехословацькой републікы – державы Чехів, Словаків і Русинів. В рамках того юбілею намагають ся русиньскы орґанізації приготовльовати і різны події почас цілого рока.

Найблизшов подійов присвяченов сторічніці републікы буде конференція під назвов Русины і Чехословакія. Орґанізаторами події суть Здружіня інтеліґенції Русинів Словеньска і Пряшівска універзіта в Пряшові.

Шість лекцій в двох блоках

Конференція буде розділена до двох модерованых блоків. Першый блок буде модеровати знамый на Словакії політолоґ русиньского походжіня Александер Дулеба, котрый быв і на посаді председы Округлого стола Русинів Словеньска, історічно як першый председа той платформы.

В його блоку буде мож выслухати три лекції. Історік Петер Шворць буде занимати ся темов Русины і їх путь до Чехословацькой републікы 1918 – 1919 рр. Другым выступаючім буде Іґор Ліхтей, котрый на конференції прочітать реферат під назвов Реакція населіня Підкарпатьской Руси на присутность румуньскых войск на їй теріторії в роках 1919 – 1920. Першый блок закінчіть гость із Чеськой републікы Давід Губеный. Занимати ся буде темов під назвов Односно воєньско-безпечностных вопросів Підкарпатьской Руси в меджівойновім періоді.

Другый блок буде модеровати Петер Шворць, котрый є і ґарантом конференції, і в тій части буде мож выслухати далшы три інтересны лекції. Юрай Жаданьскый буде бісідовати на тему Господарьскы обставины на Підкарпатьскій Руси в меджівойновім періоді. Станіслав Конєчный, котрый буде выступати як другый за порядком, вязв собі до мерьку тему Чехословакія і вопрос ідентічности русиньского населіня. Маріян Ґайдош закінчіть другый блок лекційов Русины на Словакії і обновліня републікы в році 1945.

Конференцію привітать універзіта

Кедьже є Пряшівска універзіта співорґанізатором конференції, як раз в їй просторах буде наукова стріча і проходити. Конференція Русины і Чехословакія одбуде ся 15-го новембра 2018-го року і зачне о 8.30 год. Вступ є безплатный.

Подія є реалізована із фінанчнов підпоров Фонду на підпору културы народностных меншын.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА