«Слово» – 19-та неділя по Сошествії Святого Духа – неділя, 9.00 год.

В слові днешнього євангелія нас Ісус Хрістос веде ку высшым ступням хрістіаньсой досконалости. Наперед зачінать низшым ступньом і тот є про нас барз важный: Што хочете, жебы люде робили вам, робте і вы їм.

Кедь бы сьме жыли подля того правила, як бы ся змінив жывот коло нас. Кедь мы хочеме, жебы нас мали в почливости, бісідовали о нас добрі, не зневажали, не высмівали, тото саме робме і мы нашым ближным. Втогды бы ся змінив і наш погляд на другого чоловіка коло нас. Перестав бы быти лем обєктом, котрый треба выхосновати про нашы цілі ці выгоды, або конкурентом, котрого треба одсунути, жебы мы сьме забрали його місце.

Но Ісус не оставать лем на тім, іде далше. Учіть любити і неприятелів, добрі робити, жычіти, а нич за то не чекати. Бо кедь тото робиме лем тым, котры люблять нас, або робиме добрі лем тым, котры тото роблять і нам, або жычіме з тым, жебы нам вернули, втогды не сьме ліпшы од поганів, котры не мають закона, а предці выконують діла природного закона написаного в їх сердцях. Ісус на учіть іти высше. Любити і робити добро без огляду на то, ці нас будуть любити і нам творити добро, або будуть ся одплачовати ненавистьов ці робліньом зла. За тото обіцять щіру нагороду – быти дітми Отця, котрый є в небі, бо Він є милосердный і ку невдячным і підлым. Обіцять быти там, де є Отець, в Його царьстві, в Його вічній блажености.

І днешнє слово позывать нас увірити слову Хріста. Же справды є то спасительне і про нас хосенне слово, і кедь ся нам видить проти лоґікы може нашого розуму ці духа того світа. То слово повів тот, котрый є Вічна Мудрость. Прото і св. Василій говорить, же веце треба вірити Божому слову, як нашому властному мудрованю. А так приймийме тоты слова, увірьме, послухайме і старайме ся подля них жыти, жебы і нам наповнила ся Хрістова обіцянка: Ваша одміна буде щіра, будете дітми Бога. Слава Ісусу Хрісту!