«Слово» – 16-та неділя по Сошествії Святого Духа – початок нового церьковного рока – неділя, 9.00 год.

Місяць септембер є початком нового рока про нашых школярів, но є і початком нового церьковного або і літурґічного рока. Церьков нас позывать наново пережывати великы праздникы Господьскы – Рождества і Пасхы, Богородичны праздникы почінаючі Рождеством Богородиці завершуючі праздником Успенія.

Або тыж праздникы святых апостолів, мучеників, преподобных. На каждый день маме в нашім літурґічнім календарі даякого святого, котрого приклад ці героїчна любов ку Богу є актуална і про нас. На тот день нам Церьков давать чітати євангеліє як Ісус пришов до Назарета. Як мав обычай, в суботу вошов до сінаґоґы, де йому дали чітати книгу пророка Ісаії, він там нашов місце, котре представлять проґрам Його діялности.

Наперед говорить о тім, же приходить од Бога, помазаный Святым Духом, оголошати бідным євангеліє, сліпым провиджіня, увязненым свободу, оголосити рік Господнього милосердя. Жыды очековали Месію, котрый бы їм приніс політічну свободу, повернув славу, котра была за Царів Давіда і Соломона. Но Ісус приходить принести іншу свободу, інше провиджіня. Приходить принести освободжіня од рабства не римского, а рабства гріха, не провиджіня тілесным очам, а духовным.

Рік Господнього милосердя, в ґреческім тексті є Кіріу дектон – рік Господній приятный. То є, коли Бог чоловіка не судить, а принимать. Тот рік зачав приходом Хріста на тоту землю і завершыть ся Його другым приходом, коли прийде судити жывых і мертвых. В одношіню до нас тот рік милосердя або приятя значіть цілый наш жывот.

Св. Василій Великый говорить: Днеська є Бог милосердный, приготовленый одпустити каждый гріх, завтра буде немилосердным судцьом нашых слов, діл і думок. І так початок Нового церьковного рока є про нас новым Божым позваньом ку жывоту з Богом, ку правдивому покаяню – метанії, зміні думаня, од земного ку небесному, од хріха ку святости, од рабства діявола ку свободі в Хрістови. Ісус стоїть перед дверями нашого сердця і кличе. Його голос не є силный, не насилує нас. Але зохаблять нам свободу выбору. Но і зодповідность.

Най і тот церьковный рік, котрый зачінаме, буде про нас часом приближіня ку Богу, а не оддаліньом од Нього. Послухнийме тото Боже позваня, Выхоснуйме го якналіпше про нашу бессмертну душу, бо не знаме ці не є посліднім в нашім жывоті.