Ретрансмісия архієрейской літургіі з Ґорлиц – праздник сщмч. Максима – неділя, 12.00 год.

З благословліня архієпископа Паісия, православного владыкы перемышльско-ґорлицкого, радийо ЛЕМ.фм награло архієрейску Божеску Літургію служену в четвер, 6. вересня/септембра 2018 р., в кафедральным храмі Св. Тройці в Ґорлицях. Ретрансмісия святочной службы в чест праздника священномученика Максима Ґорлицкого вызвучыт в неділю, 9. вересня/септембра 2018 р., о 12.00 год.

Богослужыня очеляли архієпископ люблиньско-холмскій Авель, архієпископ перемышльско-ґорлицкій Паісий, єпископ шумперкскій Ісаія (Православна Церков Чешскых Земель і Словациі) та гайнівскій єпископ Павел. На торжестві присутны были чысленно священникы з другых єпархій ПАПЦ, єґомості з Підкарпатской Руси і Прашівщыны. До Ґорлиц приіхали поломничества з Підляша і Словациі.

На порозі ґорлицкого собору архієреів перше витали діти і парохіяне. Настоятель, о. Роман Дубец, в привитальным слові напомнул, што 2018 р. то дальшы церковны і світскы округлы річниці на Лемковині. 100 років тому Лемкы проявляли своі державотворны аспірациі. Конец 20. років ХХ ст. то тіж дальшы повороты до православя в другых лемківскых селах. Коли на Лемковині в 30. роках одраджало ся православя, на Холмщыні проходила антиправославна акция буріня церкви.

В ретрансмісиі проповід выголосит владыка гайнівскій Павел.