«Як любиш дашто робити, то роб тото на 1000%» – інтервю з Ґосьом Пауком, участничком The Voice of Poland

Сердечні просиме на інтервю з Ґосьом Пауком – Лемкыньом, участничком тогорічной едициі телевізийного проґраму The Voice of Poland. Ґося перешла до наступного етапу проґраму. Бесіду з ньом про пасию, успіхы в The Voice of Poland і дальшы співочы пляны можете прочытати ниже.

Якуб Зиґмунт (ЯЗ) – редакция ЛЕМ.фм / Ґося Паука (ҐП) – участничка The Voice of Poland

ЯЗ: Повідж нам дашто о собі? Одкаль єс? В якій родині єс ся ховала? Маш лемківскє коріня?

ҐП: Походжу зо Середы Шлезской, малого красного місточка, якє ся находит близко Вроцлавя. Моі дідове так од стороны мамы, як і няня были Лемками. Походили з Низкого Бескіду. В рамках акциі Вісла были выселены на Нижній Шлеск.

ЯЗ: Одкаль в Тебе пасия до музыкы, співаня? Ци має то звязок з Державном Высшом Театральном Школом, в якій єс студиювала, ци любов до музыкы пришла скорше?

ҐП: В мене дома все было вельо музыкы. Вшыткы граме або грали сме на інструментах. Памятам, як моя сестра з братом грали на піаніно на штыри рукы, а я до того співала-м і грала-м на тамбурині. Як єм ся вчыла в ДВТШ, то усвідомила-м си тото, же жебы быти вполни щестливом, мушу іщы співати. На щестя, тоты дві ділины мистецтва ся не выключают, можу іх і лучыти.

ЯЗ: Выступила єс в проґрамі The Voice of Poland, в першым одтинку девятой сериіі, і то з великым успіхом, бо вшыткы з жырі обернули ся на фотелях, а публика жыво реаґувала на Твій выступ. Перешла єс аж і до другого етапу. Чом взагалі хтіла-с вказати ся в тым проґрамі?

ҐП: Як бы-м перед смертю думала над річами, якых в жытю не робила-м і барз того жалую, то на першым місци была бы участ в The Voice of Poland. Не мам што стратити, одворотні, можу зыскати. Передовшыткым слухачів. Надію ся, же участ в проґрамі допоможе мі релізувати моі музычны мриі.

ЯЗ: Спомнула-с, же мусіла-с ждати аж до девятой едициі проґраму, жебы рішыти, же береш в ним участ. Што так направду ся діяло?

ҐП: Обзерала-м скорійшы едициі The Voice of Poland. Не чула-м ся так добра, жебы-м могла станути перед тренерами. Але кілько ся можна бояти? Як любиш дашто робити, то роб тото на 1000%! Хто не рызикує, не пиє шампаньского. А я барз люблю шампанькє!

ЯЗ: Повідж, як то є стояти на сцені в телевізийным студию, маючы свідоміст, же перед Тобом є жырі та публика, же буде Тя обзерало пару мілийонів люди?

ҐП: Як іде о мілийоны зрителів, то не маш такой свідомости, стоячы там, на сцені. Але в студию є так велика публика, же то уж може місцно параліжувати. Но і до того є іщы жырі… На початку ся мі здавало, же мам сон, і то такій дост приємний…

ЯЗ: Ци перед выступом была-с в страху?

ҐП: Так, была-м. Все єм. Але дозвалят мі ся тото зосередити на тым, што мам зробити. Як єм в страху перед выступом, то знам, же мі залежыт. Было бы злі, як бы-м не была.

ЯЗ: Чом выбрала-с співанку «All Summer Long»? Любиш тот жанр музыкы? Чого слухаш наштоден?

ҐП: Рокова з мене дівка. Але моє серце рушают кажды звукы, передовшыткым тоты правдивы. Може быти і нечысто, і нерівно, але як хтоси барз пережыват тото, о чым співат, то мя уж купил. Як іде о співанку, яку єм выбрала, залежало мі на тым, жебы был то енерґетичний твір і не за барз «вымучений» радийом. Люблю мірити ся зо співанками, якы сут выконуваны мужчынами.

ЯЗ: Чого ся можеме сподівати, як іде о Тебе, в наступным етапі? Повіш нам, коли можеме обізрити дальший Твій выступ в The Voice of Poland?

ҐП: Дальшым етапом буде Борба. Думам, же певно в жолтни/окробрі буде мож ю видіти. Можу лем повісти, же не бракне позитивной енерґіі з мойой страны. Але думам, же то дякы моім лемківскым коріням!

ЯЗ: Дякую за бесіду!