Бескідник #25 – пятниця, 11.00 год.

Бескідник. Так ся называт ґеоґрафічно-туристичний радийовий проґрам, котрий ведений єст Якубом Зиґмунтом в кажду пятницю од 11.00 до 12.00 год.

В найблизшу пятницю, 7. вересня/септембра 2018 р., поіхаме з Лукашом Коцевяком до Афґаністану. Лукаш, прелеґент І Лемківского Подорожничого Фестівалю ЛЕМтравел, котрий проходил в маю 2018 р. в Рускій Бурсі в Ґорлицях, вышол на найвысший верх той державы в серпни/авґусті т.р. Была то гора Ношак (7429 м.). В проґрамі дознаме ся про його пригоду, як він тото зробил, як ся рыхтувал і як то вкінци єст ходити по Высокых Горах. На конец Бескідника, як все, підеме на роверову екскурсию по Низкым Бескіді – заран такыма селами як Тылява, Ольховец та Гырова.

До заране. Чуєме ся, як все, о єденадцетій!

В Бескіднику іздиме в далекы і близшы подорожы глядати природничо інтересуючых місц на світі і в Карпатах. В каждым проґрамі дознаме ся про нову роверову екскурсию в Низкым Бескіді. А вшытко тото буде перемішане, як все, музыком зо світа.